Қозоғистон Қарағанда фармацевтика комплексида (ҚФК) ишлаб чиқарилган «Спутник V» вакцинасини рўйхатдан ўтказди. Бу ҳақда компания матбуот хизматига таяниб, «РИА Новости» хабар берди.
«Қарағанда фармацевтика комплекси Қозоғистон Республикаси ҳудудида коронавирус инфекциясига қарши ‘Гам-КОВИД-Вак’ (‘Спутник V’) вакцинасини рўйхатдан ўтказиш жараёнини якунлади», — дейилади ҚФК пресс-релизида.
Хабарда айтилишича, 13 февраль куни Қозоғистон Соғлиқни сақлаш вазирлигининг эксперт ташкилоти томонидан рўйхатга олишга оид материалларини кўриб чиқиш натижалари бўйича эмлашнинг хавфсизлиги, сифати ва самарадорлиги тўғрисида хулоса қилинган. Ушбу хулоса асосида Соғлиқни сақлаш вазирлигининг Тиббиёт ва фармацевтика назорати қўмитасига рўйхатдан ўтиш гувоҳномасини олиш учун ариза юборилган.
Аввалроқ Қозоғистонда 1 февралдан Россияда ишлаб чиқарилган «Спутник V» вакцинаси ёрдамида коронавирусга қарши эмлаш бошлангани ҳақида хабар берилганди. Мамлакатга вакцинанинг биринчи партияси бир марталик импорт рухсатномаси асосида етказиб берилган.
ҚФК рус компонентларидан фойдаланиб, «Спутник V» вакцинасини ишлаб чиқаришни бошлади. Дастлабки ҳисоб-китобларга кўра, 2021 йил февраль ойи охирида мамлакатнинг барча ҳудудларига ҚФК томонидан ишлаб чиқарилган «Спутник V» вакцинасининг, тахминан, 90 минг дозасини етказиб бериш режалаштирилган.
Бундан ташқари, 2021- йилнинг 2-чорагидан бошлаб Қозоғистонда ишлаб чиқарилган QazCovid-in препаратидан коронавирусга қарши эмлаш учун фойдаланиш режалаштирилган, мазкур препарат ҳозирда клиник синовларнинг учинчи босқичидан ўтмоқда. Январь ойи охирида соғлиқни сақлаш вазирининг биринчи ўринбосари Марат Шоранов коронавирусга қарши эмлаш ҳамма учун бепул эканини, аҳолининг хавф остида бўлмаган қисми учун вакцинация апрель—май ойларида амалга оширилишини эълон қилган.
Эслатиб ўтамиз, Қозоғистонда коронавирусга чалинганлар сони 200 минг нафардан ошган. Мамлакатда пандемия бошидан бери 3 мингдан ортиқ одам коронавирус қурбони бўлган.
Изоҳ (0)