AQSh sobiq prezidenti Donald Tramp impichment jarayoni doirasida AQSh Kongressida ko‘rsatma bermaydi. Bu haqda Trampning maslahatchisi Jeyson Miller CNN’ga ma’lum qildi, deb yozadi “RBK”.
Foto: Reuters
“Prezident nokonstitutsion jarayonda ko‘rsatma bermaydi”, — dedi u.
Avvalroq AQSh Kongressining Vakillar palatasidan ayblovchilar Trampga xat yuborib, 8—11-fevral kunlari uning impichmenti doirasida qasamyod qilib ko‘rsatma berishni talab qilgan edi. Ayblovchilar sobiq prezidentning guvohlik berishdan ehtimoliy bosh tortishini uning aybdorligi isboti sifatida qabul qilish huquqiga ega ekanliklarini aytgan edi.
Trampning advokatlari Bryus Kastor va Devid Shon ayblovchilarning jarayon doirasida so‘zga chiqish so‘rovini “piar hiyla” deb atadi. “Siz aniq bilganingizdek, bu nokonstitutsion jarayon shunchaki qandaydir salbiy natijalarga olib kela olmaydi”, — dedi huquqshunoslar. Ularning so‘zlariga ko‘ra, kongressmenlar o‘zlarining Trampga qarshi ayblovlarini isbotlay olmaydi, “impichment jarayonini o‘tkazish maqsadida konstitutsiyadan foydalanish esa bunday o‘yinlarni o‘ynash uchun o‘ta jiddiy ish”.
Avvalroq Trampga nisbatan impichment jarayonini noqonuniy deb topishga respublikachi senator Rend Pol da’vat etgan edi. Uning aytishicha, sobiq prezident endi davlat lavozimini egallab turmaganligi va xususiy fuqaro bo‘lganligi sababli, impichmentdan ma’no yo‘q. Senat Polning tashabbusini qo‘llab-quvvatlamadi.
Eslatib o‘tamiz, AQSh Vakillar palatasi 13-yanvar kuni Trampga impichment e’lon qilgandi. Uni hokimiyatdan chetlatish to‘g‘risidagi rezolyutsiya kongressmenlarning 232 nafari, shu jumladan, 10 nafar respublikachi ham ovoz bergan. Yana 197 kishi Trampning chetlatilishiga qarshi chiqdi.
Trampning impichmenti bo‘yicha jarayon Senatda 8-fevraldan keyin boshlanadi, deya ma’lum qilgan edi Kongress yuqori palatasidagi demokratlar yetakchisi Chak Shumer. Vakillar palatasi Senatga rezolyutsiyani 25-yanvar kuni kiritishi kerak edi. Amerika sobiq yetakchisi qo‘zg‘olonga da’vat qilganlikda ayblanmoqda.
