АҚШ Сенати Дональд Трампни импичмент иши бўйича оқлади

АҚШ Сенати собиқ президент Дональд Трампнинг импичментига қарши овоз берди, дея хабар қилади «РБК». Жараён CNBC телеканали ва Американинг бошқа ОАВлари орқали трансляция қилинди.

Собиқ давлат раҳбарига нисбатан қўзғалонга даъват қилганлик айбловини ёқлаб Конгресс юқори палатасининг 57 нафар аъзоси овоз берди. 43 сенатор қарши чиқди. Импичментни тасдиқлаш учун камида 67 киши ёқлаб овоз бериши керак эди.

Трампга нисбатан импичментни кўриб чиқиш 9 февраль, сешанба куни бошланди. 13 февраль куни кечқурун ҳимоя ва айблов томонлари жараённи чўзмаслик учун гувоҳларни сўроқ қилмасликка қарор қилди. Якуний далиллар учун томонларга ажратилган тўрт соатдан икки соатга яқини керак бўлди.

Бунгача Демократик партиядан сенаторлар гувоҳларни чақиришни таклиф қилди, аммо бу Трамп ҳимоясининг салбий муносабатига сабаб бўлди ва улар ҳам ўз гувоҳларини чақиришни талаб қилди. Бунинг ўрнига ишга конгрессвумен Жейми Херрера Батлер ва исмлари ошкор қилинмаган шахсларнинг ёзма аризаларини аралаштиришди.

Трампнинг ўзи жараёнда қатнашиб, кўрсатма беришдан бош тортди. Собиқ президентни айбловчилар бу Оқ уй собиқ раҳбарининг айбдорлиги фойдасига ҳисобланишини маълум қилди. Унинг ҳимояси импичментни конституцияга зид деб атади, чунки Трамп давлат лавозимини ортиқ эгаллаб тургани йўқ.

Агар Трамп айбдор деб топилганида, у бошқа ҳеч қачон президент лавозимига даъвогарлик қила олмаган бўларди.

6 январь куни президент сайлови натижаларидан норози бўлган Трамп тарафдорлари Вашингтонда уни қўллаб-қувватлаб митинг ўтказгач, Капитолий биносига шиддатли ҳужум уюштирди. Оқибатда бинога зарар етказилди, беш киши ҳалок бўлди (улар орасида бир полициячи бор), камида 60 киши жабрланди.

Шундан кейин Америка Конгресси аъзолари, шу жумладан, бир нечта республикачилар ҳам Трампни тартибсизликларга даъват қилишда айблаб, унга импичмент эълон қилишга чақирди. У АҚШ тарихида икки марта импичмент эълон қилинган биринчи президент бўлди.

Трампга нисбатан биринчи импичментга АҚШ Вакиллар палатаси спикери Нэнси Пелоси 2019 йил сентябрда ташаббускорлик қилган. Унга Трампнинг Украина президенти Владимир Зеленский билан музокаралари эълон қилиниши сабаб бўлган. Америка етакчиси Киевни Трампнинг 2020 йилги сайловлардаги бош рақиби, якунда эса 46-АҚШ президентига айланган Жо Байденнинг ўғли — Хантер Байденнинг фаолиятини текширишни бошлашга оғдирмоқчи бўлган.

Демократлар партияси етакчилари айтишича, Трамп Зеленскийга босим ўтказиш учун ўз имкониятидан (Украинага ҳарбий ёрдамни тўхтатиб қўйиш) фойдаланган. Импичмент ҳокимиятни суиистеъмол қилиш ва Конгресс текширувига тўсқинлик қилиш ҳақидаги иккита модда бўйича эълон қилинган. Трамп бу айбловларни рад этган. 2020 йил февралида Сенат уни иккала модда бўйича ҳам оқлаган.