ЖССТ: Хитой ҳукумати COVID-19’га чалиниш бўйича илк ҳолатлар ҳақидаги маълумотларни беришдан бош тортди

Хитой ҳукумати Жаҳон соғлиқни сақлаш ташкилотига (ЖССТ) коронавирусга чалиниш бўйича илк ҳолатлар тўғрисидаги дастлабки маълумотларни тақдим этишдан бош тортди. Бу ҳақда Хитойда бўлиб қайтган ЖССТ мутахассислари берган хабарга асосланиб, Meduza ёзмоқда.

Мутахассисларнинг айтишича, Хитой ҳукумати 2019 йил декабрь ойида Ухань шаҳрида қайд этилган коронавирус бўйича дастлабки 174 та ҳолат тўғрисида маълумот олиш учун юборилган сўровларни рад этган.

Бунинг ўрнига, мутахассисларга кўриб чиқиш учун ушбу ҳолатлар юзасидан фақат хитойлик олимлар томонидан ўтказилган текширув натижалари берилган. Бу ЖССТ мутахассисларига вируснинг қачон ва қандай тарқалишига оид дастлабки босқичлар ҳақида ўз таҳлилларини ўтказишга имкон бермаган.

«Улар бизга бир қанча намуналарни кўрсатди, аммо бу тўлиқ таҳлил ўтказиш учун етарли эмас, ваҳоланки, бундай таҳлил эпидемиологик текширувлар учун одатий иш», — деди ЖССТ экспертларидан бири Доминик Дуаер.

Аввалроқ Уханга ташриф буюрган ЖССТ экспертларидан бири Владимир Дедков коронавируснинг Ухандаги лабораториядан сизиб чиққанини тасаввур қилиш қийинлигини айтганди. Дедков, шунингдек, Ухань шаҳридаги денгиз маҳсулотлари бозорида коронавирус инфекциясининг пайдо бўлиши учун барча шароитлар мавжудлигини таъкидлаган, чунки у санитария қоидалари нуқтаи назаридан талабларга умуман жавоб бермайди.

Эслатиб ўтамиз, коронавирус инфекциясининг пайдо бўлиш сабабларини ўрганаётган ЖССТ экспертлари 14 январь куни Ухань шаҳрига етиб келганди. Мутахассислар Ухань шаҳрида COVID-19 келиб чиқишига оид муҳим далиллар топилганини маълум қилган.