Европа марказий банки собиқ раҳбари Марио Драги бошчилигидаги Италия Вазирлар Маҳкамаси 13 февраль, шанба куни биринчи мажлисини ўтказди. Бу ҳақда «Интерфакс» хабар қилди.
Янги бош вазир ва 23 нафар вазир Квиринал саройида президент Сержо Маттарелла иштирокидаги йиғилишда қасамёд қилди.
Драги аввалги бош вазир Жузеппе Конте бошчилигидаги Вазирлар Маҳкамасининг таркиби парламент ишончини йўқотиб, сиёсий беқарорлик юзага келган вақтда янги ҳукуматни шакллантирган. Якунда Маттарелла COVID-19 коронавирус пандемияси сабаб муддатидан илгари сайловлар ўтказмасликка қарор қилди. У бунинг ўрнига Драгига пандемияга қарши курашиш ва иқтисодий муаммоларни ҳал этиш учун сиёсий бўлмаган ҳукумат шакллантиришни топширди.
Драги февралдаги маслаҳатлашувлардан кейин асосий сиёсий партияларни қўллаб-қувватлади ва Вазирлар Маҳкамаси таркибини шакллантирди. Янги ҳукумат таркибига технократлар ва Италия сиёсий кучларининг вакиллари ҳам киритилди. Эски ҳукуматнинг бир нечта вакили бўлган вазирлар ўз лавозимини сақлаб қолган.
«Беш юлдуз ҳаракати» етакчиси Луижи Ди Майо Италия ташқи ишлар вазири лавозимида қолган. Мудофаа вазири лавозимида ишлаган Лоренцо Гуэрини (Демократик партия), ҳеч қайси бир партияга аъзо бўлмаган ички ишлар вазири Лучана Ламоржезе ҳам ҳукумат таркибидаги ўрнини ўзгартирмаган.
Марта Картабия адлия вазири, Даниэле Франко иқтисодиёт вазири лавозимига тайинланган. Иккала лавозим тайинлови ҳам сиёсий эмас. Иқтисодий тараққиёт вазири лавозимини Жанкарло Жоржетти («Лига» партияси) эгаллаган.
Келаси ҳафтада парламентда Италиянинг янги Вазирлар Маҳкамаси таркибига ишонч билдириш бўйича муҳокама жараёни ва овозга қўйиш амалга оширилади.
Аввал Италияда коронавируснинг янги штамми туфайли чекловлар кучайтирилгани, Италия мафияси тез ёрдам машиналарига сиренадан фойдаланишни тақиқлагани, февраль бошида мамлакатда коронавирусга қарши вакцина танқислиги кузатилгани ҳақида хабарлар берилган.
Изоҳ (0)