Тошкент шаҳридаги «Мовий гумбазлар» ресторани олдидаги хиёбонда 2019 йилда 6 миллиард сўмлик таъмирлаш ишлари амалга оширилган. Бу ҳақда 13 февраль куни Тошкент шаҳар ҳокими Жаҳонгир Ортиқхўжаев «Истиқлол» мажмуасининг қурилиш масаласида жамоатчилик вакиллари билан бўлиб ўтган учрашувда айтиб ўтди.
«Мен бу ерга икки йил аввал келган эдим. Ерда ётган нарсаларни кўриб, бу ерга биров оиласи билан келмасди», — дея пойтахт ҳокимидан иқтибос келтирмоқда, «Дарё» мухбири Мусулмонбек Иброҳимов.
«Мовий гумбазлар» ресторани стол, креслолар олиб чиқиб чилимхона қилиб қўйган эди. Уларни олдирдик, тозалатдик, ноқонуний қурилишларни олиб ташладик, чиройли жойга айлантирдик. Бунга 6 миллиард сўм пул сарф қилинди. Ҳамма «бюджетнинг пулими» деб сўраши мумкин. Йўқ, мен ўз шахсий маблағимдан қилганман», — деди Жаҳонгир Ортиқхўжаев.
Тошкент шаҳар ҳокимининг алоҳида таъкидлашича, «Мовий гумбазлар» ресторани олдидаги хиёбон у учун ҳам муқаддас жой.
«Бу жойда менинг ҳам ёшлигим ўтган, кўпчиликка ўхшаб мен ҳам, шу хиёбонни сақлаб қолишни хоҳлайман. Мен ҳам Тошкентда 46 йилдан буён яшайман», — дея қўшимча қилди пойтахт раҳбари.
Аввалроқ Жаҳонгир Ортиқхўжаев «Истиқлол» мажмуасини барпо этиш масаласи юзасидан аҳоли билан учрашгани ва боғдаги бир дона дарахт кесилса, ўша куниёқ лавозимидан кетишга тайёрлигини маълум қилган эди. Шунингдек, пойтахт раҳбари Тошкент шаҳар ҳокимлигига ишончсизлик билдираётганларга жавоб қайтарганди.
Изоҳ (0)