Ўзбекистонда 2020 йилдаги «снос»лар туфайли бузилган мулкларнинг ярмидан кўп қисмига компенсация тўланмаган. Бу ҳақда АОКАда ўтказилган брифингда Бош прокуратура бошқарма прокурори Абдураҳим Муҳиддинов маълум қилди.
Прокуратура органлари томонидан давлат ва жамоат эҳтиёжлари учун ер участкалари олиб қўйилиши муносабати билан бузилган мулклар бўйича етказилган зарарларнинг қопланиши таҳлил этилди.
Қайд этилишича, 2020 йилнинг 1 январь ҳолатига кўра, бузилган мулклар бўйича компенсация тўловларидан қарийб 443 миллиард сўм қарздорлик мавжуд бўлиб, ўтган йилда бу қарздорликнинг атиги 202 миллиард сўми ёки 45 фоизи мулк эгаларига қоплаб берилган, холос.
Маълумот учун, тўланган қарздорликнинг 151,5 миллиард сўми нақд пул, 10,7 миллиард сўми ер бериш, 39,2 миллиард сўми мулк бериш ҳисобига тўғри келган.
Шу билан бирга, ҳудудий ҳокимликлар томонидан бузилишлар бўйича қабул қилинган 52,6 миллиард сўмлик 196 та қарорларнинг 76 таси ёки 39 фоизи бўйича амалдаги тартибга риоя этилмаган.
Эслатиб ўтамиз, Тошкент ҳокими 2021 йил охиригача «снос»лар бўйича барча қарзларни тўлашга ваъда берганди.
Бундан аввал Шайхонтоҳур прокуратураси Навоий кўчасидаги бузилган дўконлардан бирининг компенсацияси тўланмагани сабаб Тошкент ҳокимлигини судга бергани, Расул Кушербаев 2021 йилги давлат бюджети лойиҳасида «снос»лар бўйича тадбиркорларга ажратилган пул жуда камлигини танқид қилгани ҳамда МИБ фарғоналик тадбиркорнинг бузилган дўкони учун ҳокимиятдан 148 млн сўм ундиргани ҳақида хабар берилганди.
Изоҳ (0)