Америка ҳукумати 2020 йилнинг октябрь ойида ўша пайтдаги мамлакат президенти Дональд Трампда коронавирус касаллиги қанчалик оғир кечгани тўғрисидаги маълумотларни сир тутган. Бу ҳақда The New York Times (NYT) маълумотига таяниб «РБК» ёзмоқда.
Хабарга кўра, Трампнинг аҳволи «жамоатчиликка маълум қилинганидан» кўра ёмонроқ бўлган. Унинг қонида кислород миқдори кам бўлгани сабабли мутахассислар уни сунъий нафас олдириш аппаратига улашга тўғри келишидан хавотирланган. Трампда, шунингдек, коронавирус пневмонияси билан боғлиқ аломатлар, шу жумладан ўпка инфильтрацияси белгилари бўлгани айтилмоқда.
NYT нашрининг таъкидлашича, шифокорлар «ниҳоятда хавотирга тушган», аммо Трампнинг атрофидагилар «вазият жиддийлигини яширмоқчи» бўлиб, собиқ президентнинг тузалиб бораётганини маълум қилган. Республикачининг аҳволига оид хавотирлар туфайли шифокорлар уни даволаш учун ўша пайтда ҳали тасдиқлаш тартиби тугалланмаган Regeneron препаратини қўллаган, дейилади хабарда.
Трамп 2020 йилнинг 2 октябрь куни коронавирусга чалингани ҳақида эълон қилганди. Ўша куни у Уолтер Рид тиббиёт марказига келган. Собиқ давлат раҳбарини даволовчи шифокор Шон Конли Трамп ўзини яхши ҳис қилаётганини, унинг нафас олишида муаммолар йўқлигини айтганди. Трампнинг ўзи эса уч кундан кейин ўзини яхши ҳис қилаётганини ва тиббий муассасадан чиқиб кетаётганини маълум қилган.
Трамп 3 ноябрь куни бўлиб ўтган президентлик пойгаси ўртасида касал бўлиб қолганди. Касалхонадан чиққанидан сўнг, Трамп вертолётда Оқ уйга учиб борди ва америкаликларга видеомурожаат ёллаб, уларни коронавирусдан қўрқмасликка чақирган ҳамда ўзини 20 йил аввалгидан яхшироқ ҳис қилаётганини таъкидлаган.
Эслатиб ўтамиз, АҚШ президенти Дональд Трамп коронавирусга топширган биринчи тестининг жавоби ижобий чиққанини яширгани маълум бўлганди.
Изоҳ (0)