Amerika hukumati 2020-yilning oktabr oyida o‘sha paytdagi mamlakat prezidenti Donald Trampda koronavirus kasalligi qanchalik og‘ir kechgani to‘g‘risidagi ma’lumotlarni sir tutgan. Bu haqda The New York Times (NYT) ma’lumotiga tayanib “RBK” yozmoqda.
Xabarga ko‘ra, Trampning ahvoli “jamoatchilikka ma’lum qilinganidan” ko‘ra yomonroq bo‘lgan. Uning qonida kislorod miqdori kam bo‘lgani sababli mutaxassislar uni sun’iy nafas oldirish apparatiga ulashga to‘g‘ri kelishidan xavotirlangan. Trampda, shuningdek, koronavirus pnevmoniyasi bilan bog‘liq alomatlar, shu jumladan o‘pka infiltratsiyasi belgilari bo‘lgani aytilmoqda.
NYT nashrining ta’kidlashicha, shifokorlar “nihoyatda xavotirga tushgan”, ammo Trampning atrofidagilar “vaziyat jiddiyligini yashirmoqchi” bo‘lib, sobiq prezidentning tuzalib borayotganini ma’lum qilgan. Respublikachining ahvoliga oid xavotirlar tufayli shifokorlar uni davolash uchun o‘sha paytda hali tasdiqlash tartibi tugallanmagan Regeneron preparatini qo‘llagan, deyiladi xabarda.
Tramp 2020-yilning 2-oktabr kuni koronavirusga chalingani haqida e’lon qilgandi. O‘sha kuni u Uolter Rid tibbiyot markaziga kelgan. Sobiq davlat rahbarini davolovchi shifokor Shon Konli Tramp o‘zini yaxshi his qilayotganini, uning nafas olishida muammolar yo‘qligini aytgandi. Trampning o‘zi esa uch kundan keyin o‘zini yaxshi his qilayotganini va tibbiy muassasadan chiqib ketayotganini ma’lum qilgan.
Tramp 3-noyabr kuni bo‘lib o‘tgan prezidentlik poygasi o‘rtasida kasal bo‘lib qolgandi. Kasalxonadan chiqqanidan so‘ng, Tramp vertolyotda Oq uyga uchib bordi va amerikaliklarga videomurojaat yollab, ularni koronavirusdan qo‘rqmaslikka chaqirgan hamda o‘zini 20 yil avvalgidan yaxshiroq his qilayotganini ta’kidlagan.
Eslatib o‘tamiz, AQSh prezidenti Donald Tramp koronavirusga topshirgan birinchi testining javobi ijobiy chiqqanini yashirgani ma’lum bo‘lgandi.
Izoh (0)