Европа парламенти Литва билан чегарага яқин жойлашган Островец шаҳридаги Беларусь атом электр станцияси ишга туширилишини тўхтатишни талаб қилди, деб ёзади «РБК». Европарламент депутатлари АЭСнинг хавфсизлиги юзасидан хавотир билдирди.
Резолюцияни қабул қилишни ёқлаб 642 депутат овоз берди, 29 нафари қарши чиқди, 21 киши бетараф қолди.
Парламент аъзолари Беларусни АЭСни «шошма-шошарлик билан фойдаланишга топширганлиги» ва «реакторнинг тез-тез авариявий тўхтаб қолишлари ва ускуналарнинг ишламай қолиши» бўйича расмий хабарлар берилмаганлиги учун танқид қилди. Улар Беларусь АЭС ишга туширилишини хавфсизликни ошириш чораларининг барчасига амал қилинмагунига қадар кечиктиришни талаб қилмоқда. Депутатлар Минскни ядровий ва экологик хавфсизлик бўйича халқаро стандартларга риоя қилишга чақирди.
Жами қуввати 2400 МВт га тенг бўлган икки реакторли Беларусь АЭС Гродна вилоятидаги Островец шаҳри яқинида қурилган. Станция қурилишида бош пудратчи сифатида Россиянинг «Росатом» давлат корпорацияси иштирок этган.
2020 йил 7 ноябрида БелАЭСнинг биринчи энергия блоки ишга туширилган. Бир неча кундан кейин станция электр энергияси ишлаб чиқаришни тўхтатган. Беларусь Фавқулодда вазиятлар вазирлиги Ядро ва радиация хавфсизлиги департаменти маълум қилишича, электр энергияси ишлаб чиқарилишининг тўхтатилиши ядро ва радиация хавфсизлигига таъсир ўтказмаган. БелАЭСдагилар АЭС тўхтаб қолиши сабабини синовлар билан изоҳлади. ОАВларга кўра, бир нечта кучланиш трансформаторларининг портлаши юз берган. 2021 йилнинг январида БелАЭСнинг биринчи энергия блоки ҳимоя тизими ишлаб кетиши натижасида ўчирилган эди.
Мавзуга доир:
- Беларусдаги АЭСда авария содир бўлса, Литвада Вилнюс аҳолисига бепул ёд тарқатилади
- Беларусдаги биринчи АЭС авария туфайли фаолиятини вақтинча тўхтатди. Лукашенко уни уч кун олдин очиб берган эди
- Литва БелАЭСда юз берган ҳодиса бўйича Беларусдан расмий маълумот сўради
- Беларусь АЭСнинг биринчи блоки яна электр тармоғига уланди
Изоҳ (0)