Бухорода қабристонни ободонлаштиришга сарфланган пуллар талон-торож қилинмагани маълум бўлди. Бу ҳақда ОАВга хабар берган мактаб директори устидан жиноят иши қўзғатилди.
«Дарё» мухбирининг фуқаро мурожаатини ўрганиш давомида олиб борган суриштирувлари натижасида «Бухорода қабристонни ободонлаштиришга сарфланиши лозим бўлган пуллар талон-торож қилингани айтилди. Прокуратура ҳолатни ўрганишни бошлади» сарлавҳали мақола эълон қилинганди.
Шофиркон тумани прокурори Жасур Тангриевнинг «Дарё»га маълум қилишича, ҳолат туман прокуратураси томонидан ўрганиб чиқилган.
«Мурожаатда маҳалла ҳудудида жойлашган ‘Мискинатo’ қабристони учун ака-ука Акмал Жўраев ва Ҳазрат Жўраев томонидан берилган 13 миллион 500 минг сўм пул бошқа мақсадларга сарфлаб юборилгани, маҳалла раиси томонидан фуқаро Баҳодир Мўминов қабристонда ишламаса-да, унга иш ҳақи тўлангани, Қурбон Аминов ҳамда Гулжаҳон Раҳимовага ҳам ноқонуний равишда 750 минг сўмдан пул берилгани, шунингдек, ҳокимлик томонидан ажратилган арзон кўмир халққа берилмагани ва ҳар бир хонадонга 20 тадан ток кўчати етказилмагани баён қилинган. Ўрганишда қабристон учун ака-ука Акмал ва Ҳазрат Жўраев томонидан хайрия қилинган 13 миллион 500 минг сўм пул ушбу қабристоннинг бир қисмини девор билан ўраш мақсадида ишлатилиб, қурилиш ишларида жами 17 миллион 410 минг сўм сарфлангани, бу ҳақда тегишли далолатномалар расмийлаштирилганлиги ойдинлашди», — деди Жасур Тангриев.
Прокуратурага кўра, фуқаро Баҳодир Мўминов туман ободонлаштириш бошқармаси томонидан 2020 йил 23 ноябрь куни «Мискинато» қабристонига қоровул вазифасида ишга қабул қилиниб, ҳозирга қадар шу вазифада ишлаб келмоқда.
Бундан ташқари, ҳолат жойида ўрганилганда фуқаро Қурбон Аминов ва унинг келини Гулжаҳон Раҳимова жамоатчилик асосида ишига жалб қилиниб, ҳар бирига 577 минг 960 сўм миқдорида иш ҳақи ҳисобланиб тўлаб берилгани, маҳаллада «темир дафтар»га рўйхатга олинган фуқароларнинг 3 нафарига бепул кўмир тарқатилгани, бироқ ҳудуддаги бошқа фуқароларга бепул кўмир берилмагани аниқланган.
«Амалдаги қонунчилик талабига кўра, арзон нархдаги кўмир олиш истагида бўлган фуқаро таъминотчи корхонага мурожаат қилиши лозим. Шунингдек, ўрганишда ‘Шофиркон пахта тозалаш заводи’ АЖ томонидан ‘Қуйи Чуқурак’ маҳалласи аҳолисига 3,5 минг дона ток кўчати тарқатилган, фақат маҳалла раиси Жасур Насруллаевнинг ушбу масалада иштирок етмагани маълум бўлди. Шу сабаб мурожаат юзасидан тўпланган ҳужжатлар ҳамда фуқаро Муҳаммад Аминовнинг ҳаракатларига қонуний баҳо бериш учун туман ИИБга юборилди», — деди туман прокурори.
«Дарё» суриштируви орқали туман прокуратураси томонидан тўпланган ҳужжатлар юзасидан туман ИИБ ҳам суриштирув ўтказган. Унга кўра, мактаб директори Муҳаммад Аминовга нисбатан Маъмурий жавобгарлик тўғрисидаги кодекснинг 40-моддаси (туҳмат, яъни била туриб ёлғон, бошқа бир шахсни шарманда қилувчи уйдирмаларни тарқатиш) билан маъмурий баённома расмийлаштирилган. Ушбу моддага кўра, айбланаётган шахснинг айби исботланса, базавий ҳисоблаш миқдорининг йигирма бараваридан олтмиш бараваригача миқдорда жарима солишга сабаб бўлади.
«Иш кўриб чиқиш учун жиноят ишлари бўйича туман судига юборилган», — деди Жасур Тангриев.
Изоҳ (0)