Тошкент вилояти ва Тошкент шаҳрида олиб берилган тадбирлар давомида гиёҳванд моддаларининг ноқонуний савдоси билан шуғулланувчи жиноий гуруҳ аниқланди, дея хабар бермоқда Давлат божхона қўмитаси.
Қайд этилишича, Давлат божхона қўмитаси Контрабандага қарши курашиш ва Божхона аудити бош бошқармаси ходимлари томонидан республика ҳудудида гиёҳвандлик воситаларини ноқонуний айланишининг олдини олиш ҳамда ушбу моддаларни сотиш ва тарқатиш билан шуғулланиб келаётган жиноий гуруҳлар фаолиятини фош этишга қаратилган тезкор тадбир ўтказилди.
Дастлаб Тошкент вилоятининг Ангрен шаҳрида жойлашган ресторанлардан бирининг олдида А.А. исмли шахс аввалдан келишилган гиёҳвандлик воситасининг бир қисмини, яъни 199,73 грамм гашиш гиёҳвандлик воситасини шартли харидорга 3000 АҚШ долларига сотаётган вақтида қўлга олинди.
Шундан сўнг ушбу шахсга хорижий давлат фуқароси томонидан гиёҳвандлик воситаси учун олиниши лозим бўлган 3000 АҚШ долларни Тошкент шаҳрида кутиб турган Д. исмли шахсга етказиб бериши ҳақида телефон орқали кўрсатма берилгач, тезкор тадбир Тошкент шаҳар Учтепа туманида давом эттирилди. Ушбу туман ҳудудидаги кафелардан бирининг ёнига Cobalt русумли автотранспорт воситасини бошқариб келган фуқаро Э.Д. 3000 АҚШ долларни олаётган вақтида ушланди.
Мазкур шахснинг автотранспорт воситаси кўздан кечирилганида машина салони ва юкхонасида картон қутиларга жойланган ҳеч қандай ҳужжатлари бўлмаган умумий қиймати 100 миллион сўмлик 17 хил турдаги жами 1951 қути дори-воситалари борлиги аниқланди.
Шундан сўнг жиноий фаолиятни тўлиқ фош этиш ва аввалдан келишилган гиёҳвандлик воситасини қолган қисмини аниқлаш бўйича олиб борилган тезкор тадбирлар давомида жиноий гуруҳ аъзолари томонидан Ангрен шаҳардаги кўприк тагига яшириб кетилган 900,3 грамм гашиш, яна бир жиноий гуруҳ аъзоси Х.Ж.нинг ижарада яшаб келаётган хонадонидан эса 328,65 грамм гашиш гиёҳвандлик воситаси ҳамда ишга алоқадор бошқа ашёлар аниқланиб, ашёвий далил тариқасида олинди.
Олиб борилган терговга қадар текширув давомида аниқланишича, юқоридаги гиёҳвандлик воситалари қўшни давлатдан ноқонуний йўллар билан олиб ўтилганлиги ҳамда қонунга хилоф тарзда пуллаш режалаштирилганлиги аниқланди.
Экспертиза хулосасига кўра тезкор тадбирлар давомида 1 килограмм 428,68 грамм гашиш ҳамда 4,21 грамм каннабис уруғи ашёвий далил сифатида олинди.
Мазкур ҳолат юзасидан Давлат божхона қўмитаси томонидан Жиноят кодексининг тегишли моддалари билан жиноят иши қўзғатилиб, тергов органига юборилди.
Бундан аввал Бектемир постида 36 ёшли Қирғизистон фуқаросининг ёнидан 8,34 грамм кўкнори бошоғи, Юқори Чирчиқдаги чўчқахона бостирмасидан 14 кг марихуана топилгани ҳамда Бухорода ўзи етиштирган каннабисни танишига 5 миллион сўмга сотишга уринган шахс ушлангани ҳақида хабар берилганди.
Изоҳ (0)