Тошкентда 12 фоизли автокредит беришга ишонтирган корхона раҳбари мижозларнинг 713,8 миллион сўмини ўзлаштиргани аниқланди. Бу ҳақда «Дарё»га Бош прокуратура матбуот хизмати хабар берди.
Департаментнинг Мирзо Улуғбек туман бўлими томонидан фуқароларнинг ҳуқуқ ва манфаатларини ҳимоя қилиш юзасидан ўтказилган терговга қадар текширувда «Э.А.» хусусий корхонаси раҳбари Д.Т. фаолияти давомида ноқонуний даромад орттиришни кўзлаб, фуқароларни йиллик устама тўлови 12 фоизни ташкил этувчи автокредит беришга қизиқтириб келганлиги аниқланган.
Корхона раҳбари 119 нафар фуқарони юқоридаги шарт билан автокредит беришга ишонтириб, улар билан 4 ой мобайнида тузилган шартномаларга асосан автомашина нархининг 6 фоиз миқдорида олдиндан тўлов шаклида корхона ҳисоб-рақамига ўтказилган 713,8 миллион сўмни ўзининг шахсий эҳтиёжларига ишлатиб юборган.
Ҳолат юзасидан корхона раҳбарига нисбатан Жиноят кодексининг 168-моддаси (фирибгарлик) 4-қисми билан жиноят иши қўзғатилиб, тергов ҳаракатлари ўтказилмоқда.
Аввалроқ Тошкентда автомашинани фоизсиз сотиш шарти билан 150 нафардан ортиқ кишини алдаб пулларини ўзлаштирган фирма фаолияти фош қилингани, фоизларсиз 40 ойда автомобиль олиб беришни ваъда қилган фирибгар фирма мансабдорлари қамоққа олингани ҳақида хабар берилган эди.
Шунингдек, қисқа вақт ичида 19,3 минг нафар фуқароларнинг жами 54,3 миллиард сўм миқдордаги пулларини фирибгарлик йўли билан қўлга киритганликда айбланиб, 6 ойдан буён суд иши кўрилаётган «Авто 60 ой» МЧЖ мансабдорлари бўйнига қўйилган 54 миллиард сўмнинг 70 фоизи турганини, имкон берилса, ҳамма пулни қайтаришини айтгани ҳақида хабар берилганди.
Мавзуга доир: Ўзбекистонда 2021 йилдан автокредит ставкалари кўтарилди
Изоҳ (0)