Андижон вилояти ҳокими Шуҳрат Абдураҳмоновнинг биринчи ўринбосари Абдужаббор Эгамбердиев Андижон туманининг янги ҳокими сифатида иш бошлади, дея хабар берди «Дарё» мухбири.
Таъкидланишича, бугун, 11 февраль куни халқ депутатлари Андижон туман кенгашининг навбатдан ташқари сессияси бўлиб ўтган. Унда ташкилий масала кўрилиб, Абдужаббор Эгамбердиев Андижон тумани ҳокими этиб тайинланган.
У 1974 йилда вилоятнинг Балиқчи туманида туғилган бўлиб, 1998 йил Андижон қишлоқ хўжалиги институтини тамомлаган.
Дастлабки иш фаолиятини 1991 йилда Балиқчи тумани Навоий жамоа хўжалиги аъзолигидан бошлаган. Турли йилларда Улуғнор тумани давлат солиқ инспекцияси инспектори, ҳисоботлар қабул қилиш шўъбаси катта инспектори, ҳуқуқий шахсларни солиққа тортиш бўлими бошлиғи, бошлиқнинг биринчи ўринбосари, Бўз, Улуғнор, Қўрғонтепа туманлари ҳамда Андижон шаҳар давлат солиқ инспекцияси бошлиғи, 2013 йилдан Андижон вилояти ҳокимининг иқтисодиёт ва ижтимоий ривожлантириш масалалари бўйича ўринбосари, иқтисодиёт ва тадбиркорлик масалалари бўйича биринчи ўринбосари вазифаларида фаолият юритган.
Эслатиб ўтамиз, аввалроқ вилоятнинг Қўрғонтепа туманига янги ҳоким тайинланганди. Шунингдек, вилоят раҳбари ўринбосарлари таркибида ҳам ўзгариш бўлиб, вилоят давлат солиқ бошқармаси бошлиғи Отабек Турсунов Шуҳрат Абдураҳмоновнинг биринчи ўринбосари этиб тайинлангани маълум бўлганди.
Изоҳ (0)