Qo‘rg‘ontepa tumaniga yangi hokim tayinlandi. Sobiq hokim Sirdaryo viloyati hokimiga o‘rinbosar bo'lgandi

Xalq deputatlari Qo‘rg‘ontepa tuman kengashining bugun, 11-fevral kuni bo‘lib o‘tgan navbatdan tashqari sessiyasida tumanga yangi hokim tayinlandi, deya xabar berdi “Daryo” muxbiri.

Ma’lum bo‘lishicha, hokimlik tumandagi Khantex Group MChJ kuzatuv kengashi raisi Elyor Nabijonovga nasib etgan.

Elyor Nabijonov 1979-yil Qo‘rg‘ontepa tumanida tug‘ilgan bo‘lib, 2000-yilda Andijon muhandislik-iqtisodiyot institutini, 2014- yilda esa Toshkent davlat iqtisodiyot universitetini tamomlagan.

Ish faoliyatini 2001-yil Tashqi iqtisodiy faoliyat Milliy banki Qo‘rg‘ontepa filiali mijozlarga xizmat ko‘rsatish sektori mutaxassisligidan boshlagan. Turli yillarda Qo‘rg‘ontepa tumani hokimligi moliya bo‘limi budjet iqtisodchisi, “O‘zsanoatqurilishbank” aksiyadorlik tijorat banki Shahrixon filiali ichki hisob-kitob sektori arxivariusi, buxgalteriya hisobi bo‘limi hisobchisi, iqtisodiy tahlil bo‘limi boshlig‘i o‘rinbosari, bankning Toshkent shahar mintaqaviy filiali kotibiyati mudiri, “OrientFinansbank” xususiy aksiyadorlik tijorat banki ijroya apparati ijro nazorati bo‘limi boshlig‘i o‘rinbosari—boshqaruv raisi o‘rinbosari yordamchisi, ijro intizomini nazorat qilish va bank xizmatchilari bo‘yicha dastlabki maslahat berish boshqarmasi boshlig‘i o‘rinbosari lavozimlarida ishlagan.

U 2019-yildan tayinlovga qadar Qo‘rg‘ontepa tumani Khantex Group mas’uliyati cheklangan jamiyati kuzatuv kengashi raisi vazifasida ishlab kelayotgan edi.

Avvalroq Qo‘rg‘ontepa tumanini 15 yildan ortiq boshqargan Avazbek Ergashevning Sirdaryo viloyati hokimining qishloq va suv xo‘jaligi masalalari bo‘yicha o‘rinbosari etib tayinlangani haqida xabar berilgandi.