Андижон вилояти ҳокими Шуҳрат Абдураҳмоновга янги ўринбосарлар тайинланди, дея хабар берди «Дарё» мухбири.
Маълум бўлишича, вилоят давлат солиқ бошқармаси бошлиғи Отабек Турсунов Шуҳрат Абдураҳмоновнинг биринчи ўринбосари этиб тайинланган.
Шуҳрат Абдураҳмонов янги ўринбосарлари ҳақида халқ депутатлари Қўрғонтепа тумани кенгашининг навбатдан ташқари сессиясида маълум қилган ва Отабек Турсуновни молия-иқтисодиёт ва камбағалликни қисқартириш масалалари бўйича биринчи ўринбосари — вилоят иқтисодий тараққиёт ва камбағалликни қисқартириш бош бошқармаси бошлиғи сифатида таништирган.
Отабек Турсунов 1984 йил Андижон шаҳрида туғилган бўлиб, 2007 йил Андижон муҳандислик-иқтисодиёт институтини тамомлаган. Иш фаолиятини Андижон шаҳридаги «Саноат қурилиш темп» масъулияти чекланган жамияти таъминотчилигидан бошлаган. 2007—2019 йилларда вилоят давлат солиқ бошқармаси фуқароларни рўйхатга олиш бўйича навбатчиси, банклар маълумотлари асосида солиқ тўловчиларнинг бюджет билан муносабатларини таҳлил қилиш шўъбаси давлат солиқ инспектори, бошқарма назорат органлари фаолиятини мувофиқлаштириш ва мониторинг олиб бориш, юридик шахсларга солиқ солиш бўлимлари бошлиғи, бошқармаси бошлиғи ўринбосари, биринчи ўринбосари вазифаларида ишлаган. 2020 йил 16 июлдан буён Андижон вилояти давлат солиқ бошқармаси бошлиғи сифатида ишлаб келаётган эди.
Муҳаммаджон Нишонов эса вилоят маҳалла ва оилани қўллаб-қувватлаш бошқармаси бошлиғи, ҳоким ўринбосари сифатида иш бошлаган.
У 1969 йилда Андижон шаҳрида туғилган бўлиб, 1992 йилда Тошкент ирригация ва қишлоқ хўжалигини механизациялаштириш муҳандислари институтини, 2004 йил Ички ишлар вазирлиги академияси тугатган. Ўтган йиллар давомида вилоят ички ишлар бошқармаси тизимида турли лавозимларда ишлаган. 2016—2017 йилларда Андижон вилояти ҳокимининг маъмурий масалалар, ҳуқуқни муҳофаза қилиш органлари фаолиятини мувофиқлаштириш, ўзини ўзи бошқариш органлари ва ёшлар сиёсати бўйича биринчи ўринбосари вазифасида ишлаган.
2018—2020 йилларда Марҳамат тумани ички ишлар бўлими бошлиғи, вилоят ИИБ пост патруль хизмати ва жамоат тартибини сақлаш бошқармаси бошлиғи сифатида меҳнат қилган. 2020 йилдан тайинловга қадар вилоят ИИБ бошлиғининг ўринбосари-ҳуқуқбузарликлар профилактикаси бош бошқармаси бошлиғи сифатида ишлаган.
Эслатиб ўтамиз, аввалроқ Андижон вилояти ҳокимининг ўринбосари, Маҳалла ва оилани қўллаб-қувватлаш бошқармаси бошлиғи Манзура Юнусова ўз аризасига мувофиқ эгаллаб турган лавозимидан озод этилгани ҳақида хабар берилганди. Унинг ўрнига 2020 йилнинг сентябрь ойида Шокиржон Болтабоев тайинланганди.
Изоҳ (0)