Андижонда 470 млн сўм кредит маблағини талон-торож қилган банк ходимларига нисбатан жиноят иши қўзғатилди

Андижонда ўзга шахс номига фирма очиб, имтиёзли кредитларни расмийлаштирган ва кредит маблағларини бошқа мақсадларга сарфлаб юборган банк ходимларига жиноят иши қўзғатилди, дея хабар берди «Дарё» мухбири Умиджон Мамарасулов.

Таъкидланишича, ДХХ вилоят бошқармаси Хонобод шаҳрида ёшларга имтиёзли кредит ажратилишини ўрганган. Натижада 18-30 ёшдаги ёшлар номига фирма очиш, имтиёзли кредитларни расмийлаштириш ҳамда кредитларни бошқа мақсадларга сарфлаш, ўзлаштириш ҳолатлари аниқланган.

Жумладан, «Халқ банки» Хонобод филиали томонидан Future Grand Houmes Plus МЧЖга дам олиш маскани ташкил этиш учун жиҳозлар сотиб олиш мақсадида 2020 йил 10 декабрдаги шартномага асосан йиллик 14 фоиз устама тўлаш шарти билан 470 миллион сўм имтиёзли кредит маблағи ажратилган. Ушбу маблағлар кредит шартномасига асосан банк филиали томонидан Center Cоmp, «Муслимахон Имкон Инвест» ҳамда Теch smart zone МЧЖларга жиҳозлар сотиб олиш учун ўтказилган.

Ўрганишлар давомида банк томонидан тақдим этилган мижознинг кредит йиғма жилдида Future Grand Houmes Plus МЧЖнинг балансида бино-иншоотлар мавжудлиги ёки бирор-бир бино иншоотни дам олиш маскани ташкил этиш учун ижарага олгани тўғрисида ҳужжатлар мавжуд эмаслиги маълум бўлган. Шунингдек, кредит ажратишдан олдинги банк томонидан ўтказиладиган дастлабки мониторинг ҳамда кредит ажратилгандан сўнг мақсадли ишлатиши бўйича мониторинг далолатномалари белгиланган тартибда расмийлаштирилмаганлиги аниқланган. Қолаверса, жамиятга ажратилган 470 миллион сўм маблағ учун таъминотчи корхоналар билан тузилган олди-сотди шартномалар, ҳақиқатда маҳсулот етказиб берилганини тасдиқловчи ҳисоб-варақ фактуралар мавжуд бўлмаса-да, банк мансабдор шахслари томонидан юқоридаги корхоналарга маблағлар ўтказиб берилган.

Маблағнинг мақсадли ишлатилиши жойига бориб кўрилганда Future Grand Houmes Plus МЧЖ раҳбари «Ўзсаноатқурилишбанк» АТБ Хонобод филиали компьютерлаштириш хизмати бош мутахассиси Фарруҳ Убайдуллаевнинг номидан ушбу банкнинг бошқарувчи ўринбосари Жасур Мамажонов кредит маблағларини талон-торож қилгани аниқланган.

Жасур Мамажоновдан олинган маҳсулотлар тўғрисида сўралганда бошқа шахсга тегишли бўлган чойхона биноларини кўрсатган.

Ҳолат юзасидан Андижон вилояти прокуратураси томонидан «Халқ банки» Хонобод филиали мансабдор шахслари ва бошқаларга нисбатан Жиноят кодексининг 167-моддаси 3-қисми «а» банди (жуда кўп миқдорда ўзлаштириш ёки растрата йўли билан талон-торож қилиш) ва 209-моддаси 2-қисми «а» банди (мансаб сохтакорлиги) билан жиноят иши қўзғатилган.

Ҳозирда ҳолат юзасидан тергов харакатлари олиб борилмоқда.