Andijon viloyati hokimi Shuhrat Abdurahmonovning birinchi o‘rinbosari Abdujabbor Egamberdiyev Andijon tumanining yangi hokimi sifatida ish boshladi, deya xabar berdi “Daryo” muxbiri.
Ta’kidlanishicha, bugun, 11-fevral kuni xalq deputatlari Andijon tuman kengashining navbatdan tashqari sessiyasi bo‘lib o‘tgan. Unda tashkiliy masala ko‘rilib, Abdujabbor Egamberdiyev Andijon tumani hokimi etib tayinlangan.
U 1974-yilda viloyatning Baliqchi tumanida tug‘ilgan bo‘lib, 1998-yil Andijon qishloq xo‘jaligi institutini tamomlagan.
Dastlabki ish faoliyatini 1991-yilda Baliqchi tumani Navoiy jamoa xo‘jaligi a’zoligidan boshlagan. Turli yillarda Ulug‘nor tumani davlat soliq inspeksiyasi inspektori, hisobotlar qabul qilish sho‘basi katta inspektori, huquqiy shaxslarni soliqqa tortish bo‘limi boshlig‘i, boshliqning birinchi o‘rinbosari, Bo‘z, Ulug‘nor, Qo‘rg‘ontepa tumanlari hamda Andijon shahar davlat soliq inspeksiyasi boshlig‘i, 2013-yildan Andijon viloyati hokimining iqtisodiyot va ijtimoiy rivojlantirish masalalari bo‘yicha o‘rinbosari, iqtisodiyot va tadbirkorlik masalalari bo‘yicha birinchi o‘rinbosari vazifalarida faoliyat yuritgan.
Eslatib o‘tamiz, avvalroq viloyatning Qo‘rg‘ontepa tumaniga yangi hokim tayinlangandi. Shuningdek, viloyat rahbari o‘rinbosarlari tarkibida ham o‘zgarish bo‘lib, viloyat davlat soliq boshqarmasi boshlig‘i Otabek Tursunov Shuhrat Abdurahmonovning birinchi o‘rinbosari etib tayinlangani ma’lum bo‘lgandi.
Izoh (0)