Шавкат Мирзиёев раислигида 10 февраль «Ёшларни қўллаб-қувватлаш ва аҳоли саломатлигини мустаҳкамлаш йили» давлат дастури ижросини самарали ташкил этиш масалалари юзасидан ўтказилган видеоселектор йиғилишида ички ишлар соҳасида қилинадиган ўзгаришлар ҳақида гапириб ўтди, деб хабар беради «Xabar.uz».
«Ички ишлар фаолиятида катта ўзгаришлар қилиш режалаштирилган. Жиноятчиликни камайтириш ва ички ишлар фаолиятини такомиллаштириш бўйича таклифларни кўриб чиқамиз. Афсуски ҳозирга қадар мавжуд статистикани яшириш ҳолатлари учраб турибди. Соҳада ўзгариш қилиш шарт. Мен ички ишлар ходимларининг меҳнатини қадрлайман. Уларнинг маошини ошириш бўйича иш олиб бормоқдамиз», — деган давлат раҳбари.
Эслатиб ўтамиз, Президент Шавкат Мирзиёев Фарғонадаги йиғилишда ҳуқуқни муҳофаза қилиш идоралари ходимлари билан суҳбатлашиб, янги қарор чиқиши ва ички ишлар тизимида маошлар оширилиши мумкинлигини маълум қилган.
«Мен ички ишлар ходимларидан миннатдорман. Пандемия вақтида осойишталигимизни таъминлаш бўйича улар ўзини кўрсата олди. Шунинг учун уларнинг маошини кўтариш, сифатли ўқитиш ва ёрдам кўрсатиш бўйича чора-тадбирлар кўряпмиз. Бир нарсани унутмаслигимиз керак, қачон жиноятчиликни камайтирсак, халқ биздан рози бўлади», – деган эди Шавкат Мирзиёев.
Изоҳ (0)