Жанубий Корея коронавирусга қарши AstraZeneca вакцинасини маъқуллади

Жанубий Корея Озиқ-овқат ва дори-дармон хавфсизлиги вазирлиги AstraZeneca компаниясининг вакцинасини маъқуллади. Бу ҳақда «РБК» хабар берди.

AstraZeneca 2021 йил 4 январь куни Кореяда вакцинасини рўйхатдан ўтказиш учун ариза топширди ва регуляторга бошқа мамлакатлардаги, жумладан, Буюк Британия ва Бразилиядаги клиник синовлар натижаларини тақдим этди. Вакцинадан фойдаланиш учун 18 ёшдан ошган фуқароларга рухсат берилади.

Шунингдек, AstraZeneca компанияси SC Bioscience Korea билан вакцина ишлаб чиқариш юзасидан ҳам шартнома тузди.

Европа Комиссияси 29 январь куни Европа тиббиёт агентлигининг ижобий қароридан кейин AstraZeneca вакцинасини иттифоқ мамлакатларида қўллашни маъқуллади. Шу билан бирга, Германиянинг Роберт Кох институти мутахассислари дорининг самарадорлиги тўғрисида маълумотлар етарли бўлмагани сабабли 65 ёшдан ошганларга қўллашни тавсия қилмади.

Коронавирусга қарши курашиш миллий штаби маълумотларига кўра, 10 февралгача мамлакатда 81 930 та вирусга чалиниш ҳолати рўйхатга олинган. Ўтган бир кун давомида эса 444 тани ташкил қилди. 8218 киши карантинда сақланяпти, 72 226 киши вирусдан соғайди. Вируснинг 31 фоизи мамлакат пойтахтида рўйхатга олинган.