АҚШ президенти Жо Байден Хитой раҳбари Си Цзиньпин билан биринчи марта телефон орқали суҳбатлашди

АҚШ президенти Жозеф Байден Хитой Халқ Республикаси раиси Си Цзиньпин билан биринчи марта телефон орқали мулоқот қилди, деб ёзади «РБК» Оқ уй матбуот хизматига таяниб.

Музокаралар чоғида Байден Пекиннинг хатти-ҳаракатларидан хавотирда эканлигини билдирди. Хусусан, у Гонконг, Шинжон ва Тайвандаги вазиятларни тилга олди. Шунингдек, Америка президенти «Пекиннинг мажбурий ва ноҳалол иқтисодий хатти-ҳаракатларига нисбатан жиддий ташвиш билдирди.

Бундан ташқари, Америка етакчиси америкаликларнинг хавфсизлиги, фаровонлиги, саломатлиги ва ҳаёт тарзини ҳимоя қилишга тайёр эканлигини айтиб, ўзининг бирламчи йўналишларидан бири сифатида эркин ва очиқ Ҳинд-Тинч океани минтақасини кўрсатиб ўтди.

Якунда иккала мамлакат етакчилари коронавирус пандемиясига қарши кураш, иқлим ўзгаришлари ва қурол тарқатмаслик борасида фикрлари билан ўртоқлашди.

Аввалроқ Байден Хитой ва АҚШ ўртасида кучли рақобат борлигини айтиб, у низога айланиб кетиши керак эмас, деган фикрни билдирган эди. Шунингдек, АҚШ президенти ўзидан аввалги давлат раҳбари Дональд Трамп каби Хитой билан савдо урушларини бошламасликка ваъда берган эди.

Бундан аввал АҚШ давлат котиби Энтони Блинкен хитойлик ҳамкасби Ян Сзечи билан телефон орқали суҳбатлашган ва АҚШ Хитойни халқаро меъёрларни бузганлик учун жавобгарликка тортишга ҳаракат қилишини билдирган эди. Хусусан, Блинкен Хитойнинг хатти-ҳаракатлари Ҳинд-Тинч океани минтақасидаги барқарорликка хавф солишини айтган.

Ўз навбатида, Хитой АҚШни сўнгги вақтларда Хитойга нисбатан йўл қўйилган хатоларни тузатиб, ҳамкорликка эътибор қаратишга чақирганди.

Эслатиб ўтамиз, АҚШ Хитойнинг Шинжон-Уйғур мухтор туманидаги уйғурларга нисбатан хатти-ҳаракатларини геноцид ва инсониятга қарши жиноят деб атаган эди. Бу ҳақда АҚШ давлат котиби Майк Помпео ўз ваколатлари тугашидан бир кун олдин эълон қилди. Аввалроқ уйғурлар геноциди ҳақида АҚШнинг сайланган президенти Жо Байден ҳам айтиб ўтган эди. АҚШ Хитойнинг уйғурларга қарши ҳаракатларини геноцид деб атаган биринчи мамлакат бўлди. Оқ уйнинг юқори мансабли вакиллари бошқа мамлакатлар ҳам тез орада АҚШдан ўрнак олишига умид қилмоқда.