Чеченистон раҳбари Рамзан Қодиров Telegram’даги каналида республикада жамоат жойларида юрганда мажбурий тартибда тиббий ниқоб тақишнинг бекор қилингани ҳақида маълумот берди.
Қодиров COVID-19 инфекциясига чалиниш хавфи ҳанузгача юқори эканлигини инобатга олган ҳолда касалликни юқтириб олиш эҳтимоли баланд бўлган кишилар ва ҳали коронавирусга чалинмаганларга ниқоб тақиш тавсия қилинишини билдирган. Шунингдек, у коронавирусга қарши вакцина билан эмлангандан кейин бир неча кун давомида тиббий ниқоб таққан ҳолда юриш зарурлигини эслатиб ўтган.
Рамзан Қодировнинг қўшимча қилишича, республика ҳукумати мамлакат ҳудудига кириш борасидаги чекловларни ҳам бекор қилган ва Россиянинг бошқа ҳудудларида яшовчи кишиларга нисбатан 2020 йил июль ойидан бери қўйилган Чеченистон ҳудудига кириш тақиқи олиб ташланган.
Чеченистон Удмуртиядан кейин одамларга тиббий ниқоб тақиб юришнинг мажбурий тартиби бекор қилинган Россиядаги иккинчи ҳудудга айланди.
2020 йил октябрь ойида «Роспотребнадзор» Россиядаги барча федерал ҳудудлар маъмуриятларига жамоат жойларида ниқобда юриш тартибини янада кучайтиришни тавсия этганди. Ноябрь ойининг иккинчи ярмида мамлакатдаги барча ҳудудларда мажбурий равишда тиббий ниқобда юриш тартиби жорий қилинди.
Изоҳ (0)