AQSh Xiaomi’ni “qora ro‘yxat”ga kiritdi. Kompaniya AQSh Mudofaa va Moliya vazirliklarini sudga berdi

Donald Tramp AQSh prezidentligidan ketishdan oldin sanksiyaga uchragan Xitoy kompaniyalari ro‘yxatini kenaytirishga ulgurdi. AQSh va Xitoy o‘rtasidagi savdo urushi biroz tinchlanganiga qaramay, sanksiyalar ro‘yxatidan yana 9 ta kompaniya o‘rin oldi, ular orasida Xiaomi va aviakosmik texnikalar ishlab chiqaruvchi Comac kompaniyalari ham bor, deb yozadi Hi-Tech.Mail.ru.

“Qora ro‘yxat”ga tushish amerikaliklarning ushbu Xitoy kompaniyalariga sarmoya kirita olmasligi va ularda ulushi bo‘lmasligini bildiradi. Taqiq 2021-yil 11-noyabrdan kuchga kiradi, bu vaqtga qadar investorlar o‘z aksiyalarini sotib yuborishi kerak.

AQSh hukumati 1999-yilgi qonunga asosan bu kabi qarorlarni qabul qilmoqda. Unga ko‘ra, mamlakat Mudofaa vazirligi Xitoy harbiylariga bog‘liq kompaniyalar ro‘yxatini shakllantiradi. Biroq hozirga qadar Amerika tomonidan Xiaomi harbiylarga tegishli ekanligi yoki ular tomonidan boshqarilishi to‘g‘risida biror isbot taqdim etilmagan.

Xiaomi hozirgi kunda butun dunyo bo‘ylab smartfonlar savdosi bo‘yicha 3-o‘rinda ketayotgan kompaniya. AQShda ushbu smartfonlar rasman sotilmaydi, faqat “aqlli” uy uchun ayrim tovarlar va tashqi akkumulyator kabi mayda texnikalarni uchratish mumkin.

Xiaomi’ning Rossiyadagi ofisi vakili kompaniyaning Xitoy harbiylarga bog‘liqlik joyi yo‘qligini ma’lum qilgan.

“Kompaniya fuqarolik va tijoriy maqsadlarda tovar va xizmatlarni taqdim etish bilan shug‘ullanishini eslatib o‘tadi. Kompaniya Xitoy qurolli kuchlarining mulki emasligini, ular bilan bog‘liqligi yo‘qligini, ular tomonidan nazorat qilinmasligi va AQSh Milliy mudofaa to‘g‘risidagi qonunida ta’kidlanganidek, “kommunistik Xitoy harbiy kompaniyasi” emasligini tasdiqlaydi”, — deyiladi xabarda.

Fond bozorida mazkur yangilik o‘z ta’sirini ko‘rsatib ulgurdi — Gonkong birjasida Xiaomi aksiyalari 12 foizga tushib ketdi.

Ma’lumotlarga ko‘ra, Xiaomi ushbu sanksiyalarga qarshi AQSh Mudofaa va Moliya vazirliklari ustidan Kolumbiya federal okrugi sudiga da’vo kiritgan. Kompaniya Xitoy harbiylariga hech qanday aloqasi yo‘qligini ta’kidlamoqda.

Eslatib o‘tamiz, 2019-yilda AQShning Xitoy bilan savdo urushi doirasida mamlakatdagi kompaniyalarga sanksiya qo‘llaganida boshlangan, o‘shandan buyon Huawei kompaniyasi ARM arxitekturasidan, Google servislaridan foydalana olmayapti va Amerika kompaniyalari bilan savdo qilish huquqidan butunlay mahrum bo‘lgan.