Туркия Ироқ ҳудудида янги ҳарбий операция бошлади

Туркия қуролли кучлари Ироқ шимолида янги ҳарбий операцияни бошлади. Бу ҳақда мамлакат мудофаа вазирлиги хабар тарқатган.

«Ироқ шимолида халқимизга ва хавфсизлик кучларига нисбатан уюштириладиган террорчилик ҳаракатларини бартараф қилиш, чегаралар дахлсизлигини сақлаш мақсадида халқаро ҳуқуқдаги ўз-ўзини мудофаа қилиш меъёрларидан келиб чиқиб 2021 йил 10 февралдан бошлаб Pençe Kartal-2 ҳарбий операцияси бошланганини эълон қиламиз», – дейилган вазирлик баёнотида.

Қайд этилишича, террорчиликка қарши операция Ироқ шимолидаги Гара вилояти ҳудудида ўтказилади. Ҳарбий ҳаракатлар мазкур ҳудуддаги Курдистон ишчи партиясининг гуруҳларига қарши олиб борилади.

Аввал Ироқда ИШИД раҳнамоларидан бири йўқ қилингани ҳақида хабар берилганди. Бир неча ой давомида тайёргарлик кўрилган антитеррор операцияси 27 январда Киркук шаҳрида амалга оширилган. Унда ИШИДнинг 10 нафар террорчиси ўлдирилганди.

Эслатиб ўтамиз, Туркия 2019 йилда Сурия шимолида курдларга қарши «Тинчлик булоғи» ҳарбий операциясини амалга оширган.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.