Сеул ҳукумати уй ҳайвонларидан коронавирусга қарши тест олишни бошлайди. Бу ҳақда Yonhap интернет нашрига таяниб Tengrinews хабар берди.
Мамлакат жанубидаги Чинжу шаҳрида уй мушугининг коронавирус билан зарарлангани аниқланганидан сўнг уй ҳайвонларидан коронавирусга қарши тест олиш ҳукумат томонидан маъқулланди.
Фақат иситма, аксириш ва нафас қисилиши каби аломатлари бўлган ҳайвонлар тест топшириши мумкин. Тестдан ўтказиш ветеринар бошчилигидаги мобил гуруҳ томонидан олиб борилади. Уй ҳайвонида коронавирус аниқланган ҳолда эгасининг яшаш жойига қараб, 14 кунга изоляцияга олинади.
Сеул карантин назорати офицери Пак Ю Мининг сўзларига кўра, изоляция учун махсус жойлар берилмайди, чунки касаллик одамларга уй ҳайвонларидан юқиши ҳолатлари тасдиқланмаган. Лекин ҳайвон эгаларининг ўзлари касал бўлса ва уларга ғамхўрлик қила олмаса, уй ҳайвонлари махсус жойга кўчирилади.
Жанубий Корея ҳукумати 2020 йил 24 ноябрдан бошлаб пойтахт минтақаси ва бошқа бир нечта жойларда ижтимоий масофа чораларини кучайтирган эди. Мамлакатдаги коронавируснинг учинчи тўлқини туфайли ижтимоий масофа даражаси иккинчи босқичга кўтарилди.
Изоҳ (0)