Бишкекнинг собиқ мэри Албек Ибраимовга қарши коррупцияга боғлиқ бўлган ҳолатлар бўйича яна бир жиноий иш қўзғатилди, деб хабар бермоқда «РИА Новости» Қирғизистон Бош прокуратураси матбуот хизматига асосланиб.
«Албек Ибраимовга сиртдан Қирғизистон Жиноят кодексининг 319-моддаси 1-қисми (коррупция) бўйича айблов эълон қилинди», — дейилади матбуот хизмати хабарида.
Назорат қилувчи органнинг сўзларига кўра, Ибраимов Бишкек мэри ва Манас халқаро аэропорти директорлар кенгаши раиси бўлганида Туркиянинг «Гата ҳаво йўллари ва транспорт» компанияси ва халқаро аэропортнинг баъзи расмийларига ноқонуний имтиёзлар бериш орқали фойда олишни кўзлаган.
Шунингдек, Ибраимов 2011 йилда мамлакатдаги энг йирик «ТНК Дастан» ҳарбий-саноат корхонаси бошқаруви раиси лавозимида ишлаган пайтида ишониб топширилган мол-мулкни ўғирлаш ва талон-торож қилишда айбдор деб топилган. Тергов 12 та жанговар торпедани Ҳиндистонга етказиб бериш пайтида қонунбузарликларга йўл қўйган деб ҳисоблайди, шунингдек, у муниципал ер участкаларини сотиш бўйича коррупция схемасини тузишда айбдор деб топилган ва барча жиноятлар учун 15 йилга озодликдан маҳрум қилинган.
Собиқ шаҳар ҳокими қамоқдан 5 октябрдан 6 октябрга ўтар кечаси юз берган тартибсизликлар фонида озод қилинган. Ибраимов Жазони ижро этиш давлат хизматининг колонияга ихтиёрий равишда қайтиш тўғрисидаги мурожаатини инкор қилди ва ҳозирда халқаро қидирувда.
Аввалроқ Қирғизистон миллий хавфсизлик хизмати раҳбари даволаниш учун чет элга кетгани, Абдулла Арипов Олмаотада Қирғизистон бош вазири Улуғбек Марипов билан учрашгани ҳамда Қирғизистонда бир ҳафта ичида иккинчи собиқ бош вазир қамоққа олингани ҳақида хабар берилганди.
Изоҳ (0)