Германия канцлери Ангела Меркель коронавирус тарқалиши сабабли тўлиқ локдаунни 1 мартга қадар узайтирмоқчи, деб ёзади «РИА Новости» Bild нашрига асосланиб.
Нашрнинг ёзишича, канцлер 10 февраль куни федератив ҳудудлар (вилоятлар) раҳбарлари билан учрашувда шундай таклиф билан чиқади. Ҳукмрон Христиан Демократик Иттифоқи партиясини ёқловчи ҳудудларнинг бош вазирлари унинг таклифини қўллаб-қувватламоқчи.
Меркель локдаунни 1 мартга қадар узайтириб, сўнгра мактаблар, болалар боғчалари ва сартарошхоналар фаолиятига рухсат берган ҳолда чекловларни босқичма-босқич бекор қилмоқчи.
Bild нашри таъкидлашича, локдаунни узайтириш бўйича якуний қарор ҳали қабул қилинмаган.
Жаҳон соғлиқни сақлаш ташкилотининг маълумотларига кўра, Германияда деярли 2,3 миллион кишида коронавирус касаллиги аниқланган, вирус оқибатида 61,6 минг киши вафот этган.
Эслатиб ўтамиз, Германияда коронавирус билан боғлиқ оғир вазият туфайли 16 декабрдан бошлаб камида 10 январга қадар давом этувчи қатъий локдаун жорий этилган эди. Кейин локдаун 31 январгача узайтирилди. Шундан сўнг, 20 январда локдаун яна бир бор узайтирилиб, чекловларни бекор қилиш муддати 14 февраль этиб белгиланди.
Бундан аввал кучли қор ёғиши туфайли Германия ва Нидерландияда транспорт ҳаракати тўхтаб қолгани, Германия коронавирус учун захира вакциналарга буюртма бергани ҳамда Франция, Чехия ва Германия мамлакатга кириш чекловларини кучайтиргани ҳақида хабар берилганди.
Изоҳ (0)