Ўзбекистонда тадбиркорларнинг радари аниқлаган жарималар қандай тақсимланиши тўғрисида хабар берилганди. Ички ишлар вазирлиги томонидан муҳокамага қўйилган Вазирлар Маҳкамаси қарори лойиҳасида Тошкентда радар ўрнатиладиган ҳудудларнинг аукцион нархлари маълум қилинган.
Фото: «Дарё»
Қарор лойиҳасига кўра, Тошкент шаҳри ҳудудида Махсус автоматлаштирилган фото ва видео қайд этиш дастурий-техник воситалар ўрнатиладиган жойларнинг минимал қиймати (бошланғич нархи) чорраҳа ва кўчаларда сутка давомида автотранспорт воситалари қатновининг ҳаракатланиш жадаллиги (сони)га боғлиқ.
Масалан, сутка давомида 20 мингтагача автотранспорт воситалари ҳаракатланадиган кўча ва чорраҳаларга Махсус автоматлаштирилган фото ва видео қайд этиш дастурий-техник воситалар ўрнатиш ҳуқуқи аукцион орқали бошланғич баҳоси базавий ҳисоблаш миқдори (БҲМ)нинг 10 баравари миқдорида белгиланади.
Скриншот: Норматив-ҳуқуқий ҳужжатлар лойиҳалари муҳокамаси портали
Бундан ташқари ҳужжат лойиҳасида Тошкент шаҳар ҳудудида интеллектуал видеокамералар ва стационар радарлар ўрнатилиши лозим бўлган жойлар рўйхати ҳам келтирилади.
Мазкур рўйхатга кўра, Тошкент шаҳрининг 462 та манзил-ҳудудида жами 2417 та видеокамера ва 157 та радар тадбиркорлик субъектлари томонидан ўрнатилиши белгиланмоқда.
Эслатиб ўтамиз, 2020 йил декабрь ойида «Давлат томонидан тартибга солинадиган соҳаларга хусусий секторни жалб этиш бўйича қўшимча чора-тадбирлар тўғрисида»ги Президент қарори қабул қилинганди. Қарорга кўра, махсус автоматлаштирилган фото ва видео қайд этиш дастурий техник воситалари ўрнатиладиган жойларни тадбиркорларга бириктириш электрон аукцион савдолари орқали амалга оширилади.
