Сурхондарёлик йигит TikTok’да танишган қизининг фотосуратларини тарқатиб юбориш билан қўрқитиб, унинг акасидан 800 доллар талаб қилди. Йигитнинг айтишича, у 800 долларни онасини даволатиш учун сарфламоқчи бўлган. Бу ҳақда «Бу кун» дастурида хабар қилинди.
Маълум қилинишича, 2021 йил 16 январь куни М. исмли шахс Ургут тумани бўйича Ички ишлар органлари фаолиятини мувофиқлаштириш бўлимига ариза билан мурожаат қилган.
Аризачининг маълум қилишича, Сурхондарё вилоятида яшовчи А. исмли шахс унга синглисининг фотосуратлари борлигини, ушбу фотосуратларни ижтимоий тармоқларга, хусусан, TikTok ҳамда Instagram’га тарқатиш билан қўрқитган.
Ушбу суратларни тарқатмаслик эвазига сурхондарёлик йигит қизнинг акасидан 800 АҚШ доллари талаб қилган.
«Қиз билан TikTok’да танишдик. Орадан 10—15 кун муддат ўтгандан кейин телефонда гаплашишни бошладик. Интернет орқали бир-биримизга расмлар жўнатдик.
Вақт ўтиб, пул зарур бўлиб қолди. Қарзларим кўпайиб кетди, онам шифохонада эди. Кейин қиздан 800 доллар сўрадим. Жавоб ёзмади, телефон қилдим, кўтармади.
Орадан вақт ўтди. Акасига айтдим, синглингни шарманда қиламан, бирга тушган расмларимиз бор, пулни ҳам, қизни ҳам мажбур берасан, дедим», – дейди айбланувчи.
Аввалроқ Самарқандда товламачи тиктокерлар талаб қилинган бир миллион сўмни олаётган вақтида қўлга тушгани, Тошкент метросида вагон ушлагичларига оёғи билан осилиб турган йигитнинг шахси аниқлангани ҳамда Тошкентда ўтказилган «дунёдаги биринчи TikTok байрами»да йилнинг энг яхши ўзбекистонлик тиктокерлари тақдирлангани ҳақида хабар берилганди.
Изоҳ (0)