O‘zbekistonda tadbirkorlarning radar o‘rnatishiga ruxsat beriladigan hududlarning auksion narxlari e’lon qilindi
O‘zbekistonda tadbirkorlarning radari aniqlagan jarimalar qanday taqsimlanishi to‘g‘risida xabar berilgandi. Ichki ishlar vazirligi tomonidan muhokamaga qo‘yilgan Vazirlar Mahkamasi qarori loyihasida Toshkentda radar o‘rnatiladigan hududlarning auksion narxlari ma’lum qilingan.
Qaror loyihasiga ko‘ra, Toshkent shahri hududida Maxsus avtomatlashtirilgan foto va video qayd etish dasturiy-texnik vositalar o‘rnatiladigan joylarning minimal qiymati (boshlang‘ich narxi) chorraha va ko‘chalarda sutka davomida avtotransport vositalari qatnovining harakatlanish jadalligi (soni)ga bog‘liq.
Masalan, sutka davomida 20 mingtagacha avtotransport vositalari harakatlanadigan ko‘cha va chorrahalarga Maxsus avtomatlashtirilgan foto va video qayd etish dasturiy-texnik vositalar o‘rnatish huquqi auksion orqali boshlang‘ich bahosi bazaviy hisoblash miqdori (BHM)ning 10 baravari miqdorida belgilanadi.
Bundan tashqari hujjat loyihasida Toshkent shahar hududida intellektual videokameralar va statsionar radarlar o‘rnatilishi lozim bo‘lgan joylar ro‘yxati ham keltiriladi.
Mazkur ro‘yxatga ko‘ra, Toshkent shahrining 462 ta manzil-hududida jami 2417 ta videokamera va 157 ta radar tadbirkorlik subyektlari tomonidan o‘rnatilishi belgilanmoqda.
Eslatib o‘tamiz, 2020-yil dekabr oyida “Davlat tomonidan tartibga solinadigan sohalarga xususiy sektorni jalb etish bo‘yicha qo‘shimcha chora-tadbirlar to‘g‘risida”gi Prezident qarori qabul qilingandi. Qarorga ko‘ra, maxsus avtomatlashtirilgan foto va video qayd etish dasturiy texnik vositalari o‘rnatiladigan joylarni tadbirkorlarga biriktirish elektron auksion savdolari orqali amalga oshiriladi.
