Америкалик хонанда Бритни Спирснинг ҳаёти ҳақидаги ҳужжатли фильм тақдим этилди (видео)

Машҳур поп юлдузи 2008 йилдан буён отасининг назоратида бўлиб, молиявий ва бошқа кўплаб ишлари отаси томонидан юритилади. Хонанданинг мухлислари эса бунинг учун #FreeBritney ҳаракатини яратган, чунки у васийликда эди. У ҳақда яратилган ҳужжатли фильм эса ушбу мавзуни батафсил ёритиб беради, деб ёзади Esquire.

Бритни Спирсга бағишланган ҳужжатли фильмнинг премьераси бўлиб ўтди, унинг номи «Framing Britney Spears» деб аталган.

Ҳужжатли фильмда хонанданинг ҳаёти ва фаолияти, шуҳратга эришуви, унинг отаси Жеймснинг васийлиги ҳамда #FreeBritney ҳаракати акс эттирилган. Ушбу ҳаракат 2020 йилда авж олди. Унга кўра мухлислар хонанда мустақилликни хоҳлаётганини ижтимоий тармоқлар орқали кенг ёйган, бунга эътибор қаратиш ҳамда ёрдам беришга чақирган. 2020 йил ноябрь ойида хонанда ота-онасини васийлик мақомидан маҳрум қилиш масаласи бўйича судда ютқазди. Бритнининг руҳий муаммолари туфайли унинг отаси 13 йилдан ортиқ вақт давомида хонанданинг молиявий масалаларини бошқариб келади. Шунингдек, унинг карьераси ва шахсий ҳаётининг кўплаб масалалари бўйича қарор қабул қилади.

«Мижозим менга отасидан қўрқишини айтди ва у карьерасини назорат қилса, бошқа куйламаслигини маълум қилди», − дейди хонанданинг адвокати Семюел Ингем ўтган йилнинг охирида бўлиб ўтган судда.

Ҳужжатли фильмни Hulu платформасида, шунингдек, инглиз тилида YouTube’да ҳам томоша қилиш мумкин.