«Оскар» мукофоти соҳибаси Женнифер Лоуренс «Тепага қарама» фильмини суратга олиш вақтида шишанинг портлаши оқибатида жароҳат олди — актрисанинг қовоғи тилинган, деб хабар беради «Film.ru».
Маълум қилинишича, Лоуренс Тимоти Шаламе билан саҳнада суратга тушган. Сюжет бўйича қаҳрамонлар ресторанда дераза ойнасининг портлаши гувоҳига айланиши керак эди. Бахтсиз ҳодиса туфайли шиша парчаларидан бири Женнифернинг кўз соҳаси атрофига шикаст етказган. Суратга олиш ишлари вақтинча тўхтатилган. Манбаларнинг сўзларига кўра, жароҳат «у қадар чуқур эмас».
«Тепага қарама» фильми Ерга метеорит яқинлашиб келаётгани ҳақида жамоатчиликни огоҳлантиришга уринган икки астроном (Лоуренс ва Леонардо ДиКаприо) ҳақида. Жамоатчилик, ҳатто АҚШ президенти ҳам (Мерил Стрип) олимларнинг далилларини тинглашдан бош тортгани сабаб вазият янада мураккаблашади.
Картина режиссёри ва сценарийси устида Адам МакКей («Ҳокимият» фильми) иш олиб бормоқда. Актёрлар таркибидан Кейт Бланшетт, Крис Эванс, Жон Хилл, Роб Морган, Рон Перлман, Ариана Гранде ва бошқалар ўрин олган. Netflix’даги премьераси 2021 йил охирларига режалаштирилган.
Изоҳ (0)