«Ўрганувчилар» фильмидаги роли учун «Оскар» ва «Олтин глобус»ни қўлга киритган актёр — Кристофер Пламмер вафот этди

Канадалик актёр Кристофер Пламмер 91 ёшида вафот этди, деб хабар беради Meduza.

Актёр Коннектикут штатидаги уйида вафот этган бўлиб, унинг ўлими сабабига аниқлик киритилмаган.

Пламмер «Мусиқа овозлари», «Пушти пантеранинг қайтиши», «12 маймун», «Тафаккур ўйини», «Аждар татуировкали қиз» каби фильмлардаги роли билан танилган.

Танқидчилар томонидан Пламмер 2011 йилда экранларга чиққан «Ўрганувчилар» фильмидаги роли учун эътироф этилган бўлиб, унда актёр ўз ролини 82 ёшида ижро этган. Айнан ушбу картинадаги роли учун унга иккинчи пландаги энг яхши актёр номинацияси бўйича «Оскар», «Олтин глобус» ва АҚШ Киноактёрлар гильдияси мукофотлари топширилган.

Пламмер кинодан ташқари, театр актёри сифатида ҳам танилган. У икки марта — 1974 ва 1997 йилларда — «Тони» мукофотига лойиқ кўрилган.

Аввалроқ «Юлдузлар жанги»даги Дарт Вейдер роли билан машҳурликка эришган британиялик актёр Дэвид Проуз, шунингдек, Жеймс Бонд роли билан машҳурликка эришган Шон Коннери 90 ёшида вафот этгани тўғрисида хабар берилганди.