Дональд Трамп АҚШ Киноактёрлар гильдияси Интизом қўмитаси уни касаба уюшмасининг тартиб-қоидаларини бузгани учун аъзоликдан чиқариб ташлаш масаласини кўриб чиқаётганидан хабар топганидан сўнг аъзоликдан ўзи кетди, деб хабар беради Esquire.
«Бугун сизларга Интизом қўмитасининг мени касаба уюшмасидаги аъзолигимдан маҳрум қилишга қаратилган эшитуви сабаб ёзмоқдаман. Бу билан кимнинг нима иши бор?!», — деб ёзади Трамп Гильдия президенти, актриса Габриэль Картерисга йўллаган мактубида. Шунингдек, у эндиликда ўзига «ҳеч қандай ёрдам бермаган» ташкилотга «ҳеч қанақа боғлиқлиги» бўлишини хоҳламаслигини таъкидлаган.
Бунга Картерис ва ижрочи директор Дэвид Уайт иккита сўз билан жавоб қайтарган: «Раҳмат сизга».
19 январь куни Гильдияда Трампни аъзоликдан чиқариш бўйича махсус комиссия чақирилган эди. Шундан сўнг унинг вакиллари ташкилотнинг Интизом қўмитасига мурожаат қилган. Улар Трамп Гильдиянинг қадриятларини — «демократия, ҳақиқат, ирқи ва динидан қатъий назар оддий америкаликларга нисбатан ҳурмат ва матбуот эркинлиги»ни бузган деб ҳисобламоқда.
«Айбловларда Трампнинг 6 январь куни Капитолийга уюштирилган ҳужумга алоқаси ва кўпчилиги Гильдиянинг аъзоси бўлган журналистлар хавфсизлигига таҳдид туғдиришга йўналтирилган ёлғон ахборот тарқатишни қўллаб-қувватлагани аниқ қайд этилган», — дейилади ташкилот баёнотида.
АҚШ Киноактёрлар гильдияси 1933 йилда ташкил этилган. Ташкилот кино, телевидение ва бошқа соҳа ходимларининг манфаатларини ҳимоя қилади. Трамп 1989 йилдан буён унинг аъзоси ҳисобланади.
Дональд Трампнинг хатида қайд этилишича, у «Намунали эркак» комедиясида, «Уолл-стрит: Пуллар ухламайди» триллерида ва бошқа кўплаб телевизион шоуларда — Saturday Night Live’дан тортиб, The Apprentice’га қадар суратга тушган.
Изоҳ (0)