Америкалик марҳум актёр Чедвик Боузман ҳар йили бўлиб ўтадиган Киноактёрлар гильдияси мукофотига 4 марта номзод сифатида кўрсатилган. Бундай натижа мукофот тарихида фақатгина Жеймс Фокс ва Мэгги Смитда кузатилган, деб ёзади Esquire.
Маълум қилинишича, Боузманнинг Жорж С.Вольфнинг «Ма Рейни: Блюзнинг онаси» фильмидаги роли энг яхши эркак ижрочи, Спайк Лининг «Қондош бешовлон» фильмидаги ижроси эса иккинчи пландаги энг яхши актёр сифатида номзод қилиб кўрсатилган. Қолаверса, ҳар икки фильм ҳам кинодаги энг яхши актёрлар жамоаси номинациясидан ўрин олган. SAG Awards мукофотининг 27-тақдирлаш маросими 2021 йилнинг 4 апрель куни Лос-Анжелесда бўлиб ўтади.
«Қора Пантера» фильмида у билан бирга суратга тушган ҳамкасби Майкл Б. Жордан Instagram саҳифасида дўстини соғинаётганини ёзиб, Боузман ҳали ҳам юқори натижаларни қайд этаётганини қўшимча қилган. Аввалроқ Чедвик драма жанридаги фильмда энг яхши эркак ижрочи сифатида «Олтин глобус» мукофотига ҳам номзод бўлган.
Эслатиб ўтамиз, Чедвик Боузман 2020 йилнинг 28 август куни саратондан вафот этган. Бу ҳақда унинг оила аъзолари ижтимоий тармоқларда хабар берганди.
Изоҳ (0)