Тошкент шаҳри аҳолиси «ЦУМ» қаршисидаги боғни ҳимоя қилиш учун имзо йиғишни бошлади. Пойтахт ҳокимлигининг боғ ҳудудида «Истиқлол» мажмуасини қуриш борасидаги лойиҳасига қарши бўлган фуқаролар онлайн равишда ҳам имзо қўйиши мумкин.
Шунингдек, боғнинг ўзига бориб ҳам имзо қўйса бўлади. Таъкидланишича, у ерда ҳар куни волонтёрлар ишламоқда. Ҳозирга қадар 3 мингдан ортиқ имзо тўпланган. Манзил ва вақтни, қаерга бориш ва боғ ҳимояси учун имзо чекишни аниқлаштириш учун Telegram’да «Космонавтлар боғимизни ҳимоя қиламиз» номли канал ҳам очилган.
«Биз — боғни ҳозирги ҳолатда сақлаб қолишни истаётган фуқаролармиз. Биз — шаҳар ландшафти ва боғдаги дарахтларнинг кесилишига қарши фуқаролармиз. Биз — шаҳар ҳокимлигидан объектни маҳаллаларнинг бузилиши ҳисобига юзага келган бўш ҳудудларга қуриш бўйича мурожаат қилаётган фуқаролармиз. Умид қиламизки, бизнинг овозимизни эшитишади!», — дейилади петицияда.
Эслатиб ўтамиз, 4 февраль куни Тошкент шаҳар ҳокимлиги Ўзбекистон мустақиллигининг 30 йиллигига бағишланган «Истиқлол» мажмуаси концепцияси лойиҳасини яратиш учун танлов эълон қилди. Мажмуани барпо этиш жойи сифатида Шароф Рашидов, Ислом Каримов ва Афросиёб кўчалари оралиғида, Марказий универмаг (ЦУМ) қаршисидаги ҳудуд танланган.
Таклиф жамоатчиликнинг кенг эътирозларига сабаб бўлмоқда. Янгиликлар остидаги изоҳларда фойдаланувчилар пойтахтдаги кам сонли яшил ҳудудлардан бирига тегинмасликни, бу ерга шаҳарнинг турли бурчаклардан одамлар дам олиш учун келишини таъкидламоқда. Сквер яқинда (2018 йилнинг баҳорида) ободонлаштирилган.
Изоҳ (0)