Ўзбекистон тарихида биринчи марта Ислом тараққиёт банки (ИТБ) гуруҳи бошқарувчилари кенгаши – Банк олий бошқарув органи раиси этиб Ўзбекистон томонидан бошқарувчи, бош вазир ўринбосари — инвестициялар ва ташқи савдо вазири Сардор Умурзоқов сайланди. Бу ҳақда вазирлик матбуот хизмати хабар берди.
Эслатиб ўтамиз, ўтган йилнинг октябрида Сардор Умурзоқов Европа тикланиш ва тараққиёт банки (ЕТТБ) бошқарувчилари кенгаши раисининг ўринбосари этиб сайланган эди.
Ўз ичига Ислом тараққиёт банки, Хусусий секторни ривожлантириш бўйича ислом корпорацияси, Халқаро ислом савдо-молия корпорацияси, Инвестициялар ва экспорт кредитларини суғурталаш ислом корпорацияси ва Ислом тадқиқот ва таълим институтини олган Ислом тараққиёт банки гуруҳи 1974 йилда Жидда (Саудия Арабистони) шаҳрида ташкил этилган. ИТБ аъзолари таркибига 57 мамлакат киради. Банк фаолиятининг асосий йўналиши — иқтисодиётнинг стратегик тармоқларида йирик инфратузилмавий ва ижтимоий аҳамиятга эга лойиҳаларни молиялаштириш.
Маълумот учун, Сардор Умурзоқов (1977 йилда туғилган) Тошкент давлат иқтисодиёт университети ва Рединг университети (Буюк Британия) магистратурасини тамомлаган, ҳозирда фан доктори илмий даражасига (PhD) эга. Сардор Умурзоқов узоқ муддат Ўзбекистон банк соҳасида, Европа тикланиш ва тараққиёт банкида (Лондон, Буюк Британия) ҳамда республика молия тизимида, хусусан, Молия вазирлиги Ғазначилигида раҳбарлик лавозимларида фаолият юритган. 2019 йилнинг январидан буён инвестициялар ва ташқи савдо вазири сифатида фаолият олиб бормоқда.
Изоҳ (0)