Наманган шаҳрида ўзганинг қаровсиз қолдирилган курткасидан телефон ва масжидга намоз ўқиш учун келган фуқаронинг оёқ кийимини ўғирлаб кетган шахс қўлга олинди. Бу ҳақда вилоят ИИБ ахборот хизмати хабар берди.
Маълум қилинишича, 2 февраль куни Наманган шаҳрида яшовчи фуқаро ИИО ФМБга ариза билан мурожаат қилган. Аризада қайд этилишича, фуқаро шу куни соат 13:00 да Наманган шаҳар «Чорсу» деҳқон бозорида жойлашган ҳожатхонада эгнида бўлган курткасини қаровсиз қолдирганлигидан фойдаланган номаълум шахс, унинг чўнтагидан нархи 160 АҚШ доллари бўлган iPhone 6S русумли уяли телефон аппаратини ўғирлаб кетган.
Наманган шаҳар ИИО ФМБ 4-сонли Жиноят-қидирув бўлими томонидан олиб борилган тезкор-қидирув ва суриштирув ҳаракатлари натижасида ушбу жиноятни Тўрақўрғон туманида яшовчи, 1981 йилда туғилган фуқаро содир этганлиги аниқланган.
Суриштирув ишлари давомида ушбу шахс жиноий ҳаракатларини давом эттириб, Наманган шаҳар «Чорсу» МФЙ ҳудудида жойлашган «Хўжа Амин» жоме масжидига намоз ўқиш учун келган, 33 ёшли фуқарога тегишли бўлган 600 минг сўмлик эркаклар қишки оёқ кийимини ҳам ўғрилаб кетганлиги аниқланган.
Наманган вилоят ИИБ ахборот хизмати ушбу ҳолат бўйича Наманган шаҳар ИИО ФМБ ҳузуридаги Тергов бўлинмаси томонидан Жиноят кодексининг 169-моддаси (ўғрилик) 2-қисми билан жиноят иши қўзғатилганлигини маълум қилди.
Эслатиб ўтамиз, 2020 йилнинг июнида Тошкентда масжидда ўғрилик қилганликда гумонланаётган 22 ёшли йигит қўлга олинган эди. Октябрда эса Ўзбекистондаги масжидларда ўғрилик қилиб юрган шахс Қаршида ушланган ва 7 йилга қамалганди.
Изоҳ (0)