Toshkent shahri aholisi “SUM” qarshisidagi bog‘ni himoya qilish uchun imzo yig‘ishni boshladi. Poytaxt hokimligining bog‘ hududida “Istiqlol” majmuasini qurish borasidagi loyihasiga qarshi bo‘lgan fuqarolar onlayn ravishda ham imzo qo‘yishi mumkin.
Shuningdek, bog‘ning o‘ziga borib ham imzo qo‘ysa bo‘ladi. Ta’kidlanishicha, u yerda har kuni volontyorlar ishlamoqda. Hozirga qadar 3 mingdan ortiq imzo to‘plangan. Manzil va vaqtni, qayerga borish va bog‘ himoyasi uchun imzo chekishni aniqlashtirish uchun Telegram’da “Kosmonavtlar bog‘imizni himoya qilamiz” nomli kanal ham ochilgan.
“Biz — bog‘ni hozirgi holatda saqlab qolishni istayotgan fuqarolarmiz. Biz — shahar landshafti va bog‘dagi daraxtlarning kesilishiga qarshi fuqarolarmiz. Biz — shahar hokimligidan obyektni mahallalarning buzilishi hisobiga yuzaga kelgan bo‘sh hududlarga qurish bo‘yicha murojaat qilayotgan fuqarolarmiz. Umid qilamizki, bizning ovozimizni eshitishadi!”, — deyiladi petitsiyada.
Eslatib o‘tamiz, 4-fevral kuni Toshkent shahar hokimligi O‘zbekiston mustaqilligining 30 yilligiga bag‘ishlangan “Istiqlol” majmuasi konsepsiyasi loyihasini yaratish uchun tanlov e’lon qildi. Majmuani barpo etish joyi sifatida Sharof Rashidov, Islom Karimov va Afrosiyob ko‘chalari oralig‘ida, Markaziy univermag (SUM) qarshisidagi hudud tanlangan.
Taklif jamoatchilikning keng e’tirozlariga sabab bo‘lmoqda. Yangiliklar ostidagi izohlarda foydalanuvchilar poytaxtdagi kam sonli yashil hududlardan biriga teginmaslikni, bu yerga shaharning turli burchaklardan odamlar dam olish uchun kelishini ta’kidlamoqda. Skver yaqinda (2018-yilning bahorida) obodonlashtirilgan.
Izoh (0)