Сирдарё вилояти Гулистон шаҳридаги «Эски бозор» ҳудудида жойлашган қассобхонада ёнғин содир бўлди. Бу ҳақда ФВВ матбуот хизмати хабар берди.
Маълум қилинишича, воқеа 7 февраль куни соат 17:55 да Сирдарё вилоятининг Гулистон шаҳри «Тараққиёт» МФЙ Алишер Навоий кўчасида жойлашган «Эски бозор» ҳудудидаги қассобхонада юзага келган. Ёнғин оқибатида қассобхона ичидаги 1 дона музлаткич ва савдо столи, жами 12 квадрат метр майдонга зарар етган.
«Воқеа жойига зудлик билан вилоят Фавқулодда вазиятлар бошқармасининг 2 та ёнғин-қутқарув экипажлари етиб борган. Ёнғин соат 18:02 да ўраб олиниб, 18:05 да батамом ўчирилган», — дейилади хабарда.
Таъкидланишича, олиб борилган тезкор ҳаракатлар натижасида қассобхонанинг 15 квадрат метр майдони сақлаб қолинган. Ҳозирда ёнғин сабаби ва моддий зарар миқдори аниқланмоқда.
Аввалроқ Фарғонанинг Ўзбекистон туманидаги бозорда ёнғин содир бўлгани, Асакадаги кийим-кечак бозорида ёнғин юз бергани, шунингдек, Тошкентда Жомий бозори яқинидаги бир нечта қурилиш дўконларида ёнғин келиб чиққани тўғрисида хабарлар берилганди.
Изоҳ (0)