Косон тумани ҳокими Асрол Бойқараев туманнинг Гулбоғ қишлоғидаги нотураржойда истиқомат қилувчи хонадон вакилларига янги уйлар қуриб берилмагунча, улар яшаб турган жойидан ҳеч қаерга чиқарилмаслигини билдирди. Бу ҳақда ҳоким иштирокидаги матбуот анжуманида маълум қилинди, дея хабар берди «Дарё» мухбири.
«Дарё»га шикоят қилган Маҳмаражаб Шарипов тадбиркор Ренат Юсупов улар яшаб келаётган нотурар бинони 2018 йил сотиб олганини айтиб, уларни яшаб турган уйидан такроран чиқармоқчи бўлганини билдирди.
«Тадбиркор бизни яна яшаб турган жойимиздан чиқаришга уринмоқда. Қурилиш қилмоқчилигини айтди. Яшаш уйимиз йўқлиги сабаб бу ердан чиқсак, қаерга борамиз, деган ташвишимиз бор. Ўтган сафарги мурожаатимиздан сўнг, ҳоким келиб карантин пайтида ҳеч кимнинг уйи бузилмаслигини айтиб кетганди. Энди шу масала яна кўтарилди ва тадбиркор яшаб турган жойимиздан чиқиб, уйни бўшатишимизни талаб қилмоқда», — деди Маҳмаражаб Шарипов.
Ҳоким мазкур мурожаатга муносабат билдирди.
«Биз ўтган сафар тадбиркор билан келишгандик ва аҳолига уй-жой қуриш имкониятини қилмасдан уларни яшаб турган жойидан чиқармасликка тўхталгандик. Мен даволанишга кетганимдан фойдаланиб, тадбиркор яна муаммони кўтарибди. Тўғри, бу ҳолатда тадбиркор ҳақ. Бироқ у ҳақ экан, деб одамларни кўчага чиқариб ҳам қўёлмаймиз-да. Эски Гулбоғ ширкат хўжалиги идорасига пул ажратиб, ўша бинони аҳолига уй қилиб бермоқчимиз. Яқинда ҳам 12 та оилага уй қуриб бергандик. Энди ўша идора ўрнида ҳам 16 та хонадонга мўлжаллаб, уй қурамиз ва шундан кейин уларни ўша уйларга кўчириб, яшаб турган нотураржойни бўшатамиз. Унгача аҳолини ҳеч ким ҳеч қаерга чиқармайди», — деди туман ҳокими.
Эслатиб ўтамиз, 2020 йил май ойида «Дарё»га мурожаат қилган косонликлар карантин пайтида уйи бузилаётганидан шикоят қилганди. Мазкур муаммо ҳақидаги мақола жамоатчилик эътиборига ҳавола қилингач, ҳоким Асрол Бойқараев муаммога эътибор қаратиб, карантин пайтида уйи бузилаётгани айтилган гулбоғликлар билан учрашиб, уларни ҳеч ким безовта қилмаслигини билдирганди.
Изоҳ (0)