Самарқандда беморларга қуйилган қон учун пул олган шифокор судланса-да, жазодан қутулиб қолди

Самарқанд вилоятининг Булунғур туманида Жиноят кодексининг 168-моддаси 3-қисми «б» банди (фирибгарлик) билан айбдор деб топилган шифокор шу кодекснинг 70-моддаси (шахснинг ижтимоий хавфлилик хусусиятини йўқотиши муносабати билан уни жазодан озод қилиш)га асосан жазодан озод қилинди. Бу ҳақда «Дарё»га Жиноят ишлари бўйича Булунғур туман суди раиси Ғайрат Негматов маълум қилди.

Суд ҳужжатларида қайд этилишича, Булунғур туман тиббиёт бирлашмасининг қон қуйиш бўлими врачи лавозимида ишлаб келган Н.Я. туман тиббиёт бирлашмасига ҳомиладорлик ҳолатида туғруқ жараёнини амалга ошириш мақсадида мурожаат қилган З.М.нинг яқинларидан беморга кесарча кесиш йўли билан ҳомиласини олиш операциясига ишлатиладиган қон учун пул сўраган. З.М.дан 450 минг сўмни қонунга хилоф равишда олиб, ўзининг шахсий манфаатлари учун ишлатиб юборган.

Бундан ташқари, шифокор жиноий ҳаракатларини давом эттириб, туман тиббиёт бирлашмасига ҳомиладорлик ҳолатида туғруқ жараёнини амалга ошириш мақсадида мурожаат қилган Б.Б.нинг кесарча кесиш йўли билан ҳомиласини олиш операциясига шифокорлар томонидан захирадаги қон ишлатилганлигини билиб, фуқаро Б.Б.нинг турмуш ўртоғи У.Т.дан пул талаб қилган.

Шифокор Н.Я. У.Т.га қўнғироқ қилиб, беморга қуйилган қон ўрнини қоплаш учун қон топширишини ёки қон олиб келиш учун 300 минг сўм пул олиб келишини тайинлаган. Бироқ У.Т. айтилган вақтда келмаган. Шундан кейин яна унга қўнғироқ қилиб, бир неча марта қон учун пул олиб келишини айтиб, савдолашиб, турмуш ўртоғига ишлатилган қон учун 250 минг сўм пул беришига келишган.

Иқтисодий жиноятларга қарши курашиш департаментининг Булунғур туман бўлими ходимлари томонидан олиб борилган тадбирда шифокор операцияда қуйилган қон учун 100 минг сўм олаётган пайтга қўлга олинган.

Жиноят кодексининг 168-моддаси (фирибгарлик) 3-қисми «б» бандида назарда тутилган жиноятларни содир қилганликда айбдор деб топилган шифокор шу кодекснинг 70-моддаси (шахснинг ижтимоий хавфлилик хусусиятини йўқотиши муносабати билан уни жазодан озод қилиш)га асосан жазодан озод қилинган.