АҚШ Қуролли Кучлари Стратегик қўмондонлиги раҳбари адмирал Чарльз Ричард Россия ёки Хитой билан ядровий уруш эҳтимолига баҳо берди. У бу ҳақда АҚШ Ҳарбий денгиз институтининг расмий нашри учун ёзилган мақоласида айтган, дея хабар бермоқда «Lenta.ru».
Унинг фикрича, СССР қулаганидан сўнг Пентагон ядровий қурол билан тўғридан-тўғри ҳарбий тўқнашув эҳтимолини кўриб чиқиши шарт бўлмаган, аммо ҳозир вазият ўзгарган.
«Минтақавий низо келиб чиққан вақтда Россия ёки Хитой анъанавий қуроллардан фойдаланган ҳолда мағлубиятга учраса ва сиёсий тизим ҳамда давлатга таҳдид туғилса, низо тезда ядро қуроли тўқнашувига айланиб кетиши эҳтимоли бор», – деди Чарльз Ричард. Унинг қўшимча қилишича, расмий Вашингтон потенциал душманлар томонидан ядро қуролидан фойдаланиш имкониятини истисно этмаслиги керак.
Адмиралнинг сўзларига кўра, АҚШ Мудофаа вазирлиги терроризмга қарши курашга эътибор қаратган бир пайтда Россия ва Хитой тажовузкор сиёсат юритишни бошлаган. Унинг қўшимча қилишича, ушбу мамлакатлар совуқ уруш авж олган пайтдан бери кузатилмаган халқаро меъёрларни куч ишлатиб бузмоқда. Адмирал бу ҳаракатлар жавобсиз қолмаслиги таъкидлади.
Ричард бошқа мамлакатларнинг тажовузкорлигини жиловлаш учун Қўшма Штатлар фаол рақобатлашиши кераклигини таъкидлади.
«Уларнинг ташаббусларига кўнсак ёки жавоб қайтармасак, улар Қўшма Штатлар жавоб беришни хоҳламаяпти ёки беролмаяпти, деган ишончларини мустаҳкамлаши хавфи бор. Бу эса уларни янада қўзғатиши мумкин», – деб хулоса қилди америкалик адмирал.
Январь ойи бошида Қўшма Штатлардаги Ратгер университети олимларининг аниқлашича, уруш пайтида ядро қуролидан кенг миқёсда фойдаланиш экваториал Тинч океанида мисли кўрилмаган об-ҳаво ўзгаришига олиб келади, бу эса сув ўтлари популяциясини 40 фоизга камайтириши ҳамда балиқ ови қисқаришига олиб келади.
Аввалроқ АҚШ Афғонистон ва Ироқдаги қўшинлари сонини ошириши мумкинлиги, Пентагон раҳбари этиб Ллойд Остин тасдиқлангани ҳамда АҚШда учувчилар томонидан видеога олинган «учар одам» аслида нима эканлиги маълум бўлгани ҳақида хабар берилганди.
Изоҳ (0)