Миллий атмосфера тадқиқотлари маркази (NCAR, АҚШ) мутахассислари COVID-19 пандемияси сабабли ижтимоий фаолликнинг пасайиши ва локдаунлар 2020 йилда Ер юзининг исишига олиб келганини аниқлади, дея хабар бермоқда «Интерфакс».
«Атроф-муҳитни ифлослантирувчи саноат корхоналари чиқиндиларининг миқдори сезиларли даражада камайган ва бу ҳароратга таъсир кўрсатмоқда», – дейди тадқиқотнинг етакчи муаллифи, NCAR олими Эндрю Геттелман.
Мутахассисларнинг фикрига кўра, бунга Ер атмосферасига кирувчи қуёш нурларини тўсиб қўядиган аэрозол чиқиндиларининг камайиши сабаб бўлган. 2020 йил баҳорида АҚШ ва Россия каби саноати ривожланган мамлакатларда аэрозол чиқиндиларини чиқариш камайган ва қуёш иссиқлигининг катта қисми сайёрамизга етиб келган.
Ўтган баҳорда Ер юзидаги ҳарорат кутилганидан Цельсий бўйича 0,1-0,3 даражагача юқори бўлган.
«Бу эффект одатда аэрозолларнинг катта миқдордаги чиқиндилари билан боғлиқ бўлган минтақаларда аниқ намоён бўлди, масалан, АҚШ ва Россиянинг аксарият қисмида ҳарорат ошиши Цельсий бўйича 0,37 даражага етган», – дейилади нашрда.
Геттелманнинг таъкидлашича, Ер юзининг қисқа муддатли бундай исишига қарамай, пандемия вақтида чиқарилган карбонат ангидрид газининг атмосферадаги кам миқдори иқлим ўзгаришини секинлаштириши мумкин.
Тадқиқотда NCAR олимларидан ташқари Оксфорд университети, Лондон Империал коллежи ва Лидс университети (Буюк Британия) мутахассислари иштирок этди.
Аввалроқ олимлар океанларда сув сатҳи кутилганидан анча тез кўтарилаётганини маълум қилгани, Ўзбекистонда иқлим ўзгаришларига мослашиш режаси қабул қилиниши ҳамда Бразилиядаги айрим тропик ўрмонлар карбонат ангидрид газини ютиш ўрнига ажратишни бошлагани ҳақида хабар берилганди.
Изоҳ (0)