Сўнгги 15 йил ичида дунёда одам савдоси қурбонлари орасида болаларнинг улуши уч бараварга ошди. Аёллар эса ушбу жиноий ҳаракатнинг асосий мақсади бўлиб қолмоқда. Бу ҳақда Бирлашган Миллатлар Ташкилотининг Гиёҳвандлик ва жиноятчилик бўйича бошқармаси (UNODC) томонидан 2 февраль куни тақдим этилган oдам савдоси бўйича ҳисоботида қайд этилган, дея хабар қилмоқда «Известия».
Ҳисоботга кўра, 2018 йилда 148 мамлакатда 50 мингга яқин одам савдоси қурбонлари аниқланган, аммо жиноий фаолиятнинг яширин хусусиятларини ҳисобга олган ҳолда қурбонлар бундан ҳам кўпроқ бўлиши мумкин.
Бунинг оқибатида одамларнинг энг заиф тоифалари – мигрантлар, ишсизлар, шунингдек, болалар зарар кўрмоқда. Қизлар, асосан, жинсий қуллик учун сотилади, ўғил болалар эса мажбурий меҳнатга жалб қилинади.
Таъкидланишича, 2018 йилда дунё бўйича одам савдоси қурбони бўлган ҳар 10 кишига бешта аёл ва икки қиз тўғри келган. Жабрланганларнинг тахминан 20 фоизини вояга етган эркаклар ва 15 фоизини ўғил болалар ташкил этган.
Сўнгги 15 йил ичида аниқланган жиноят жабрдийдалари сони ошди ва айнан болалар улуши тахминан 10 фоиздан 30 фоизгача ўсди. Вояга етган аёлларнинг улуши 2018 йилда 70 фоиздан 50 фоизгача камайди. Вояга етган эркакларнинг сони шу даврда 10 фоиздан 20 фоизгача ўсди.
Ҳисоботда айтилишича, аниқланган жабрдийдаларнинг 50 фоизи жинсий қуллик учун, 38 фоизи мажбурий меҳнат учун, 6 фоизи жиноий ишларда қатнашиш учун, 1 фоизи тиланчилик учун, қолганлари мажбурий никоҳ, тана аъзолари савдоси ва бошқа мақсадларда сотилган.
Одам савдоси билан асосан уюшган жиноий гуруҳлардаги эркаклар шуғулланади. Жабрланганлар кўпинча ижтимоий тармоқларда жиноятчиларнинг «қармоғига илинади».
UNP Ижроия директори Геда Фатҳи Валининг сўзларига кўра, дунё бўйлаб миллионлаб аёллар, болалар ва эркаклар давом этаётган COVID-19 инқирози шароитида на иш, на ўқиш ва на ижтимоий қўллаб-қувватлашга эга, шу сабабли улар одам савдосидан катта хавф остида. Валининг фикрича, одам савдогарлари коронавирус пандемиясидан фойдаланиб, ҳимоясиз қатламлардан фойдаланишларининг олдини олиш учун мақсадли чоралар кўриш керак.
Маълумот учун, 2020 йил 1 декабрда Халқаро қулликни йўқ қилиш куни арафасида БМТ бош котиби Антониу Гутерриш ҳозирги кунда дунёдаги 40 миллиондан ортиқ одам қулликнинг замонавий шаклларига дучор бўлганлигини, уларнинг 71 фоизи қизлар ва аёллардан иборат экани ҳақида маълум қилган эди.
У БМТнинг барча аъзоларини ушбу жирканч ишларга чек қўйиш учун янада кўпроқ ҳаракат қилишга чақирган.
Аввалроқ Ўзбекистонда 2017—2020 йилларда чақалоқ савдоси билан боғлиқ 185 та ҳолат аниқлангани, Тошкентда 28 ёшли аёлни Дубайга фоҳишалик қилиш учун юбораётган шахс ҳамда Тошкентда халқаро аэропортида 32 ёшли аёлни Дубайга фоҳишалик учун юбораётган эгизаклар қўлга олингани ҳақида хабар берилган эди.
Изоҳ (0)