Буюк Британияда иккинчи жаҳон уруши фахрийси, коронавирусга қарши курашда шифокорларга ёрдам бериш мақсадида хайрия жамғармаси ташкил қилган ва 32 миллион фунт стерлингдан кўпроқ маблағ йиғган, қиролича Елизаветта томонидан рицарлик унвони берилган 100 ёшли Томас Мур вафот этди. Бу ҳақда Sky News телеканали хабар берган.
Мур 31 январь куни Бедфордда касалхонага ётқизилганди. У бир неча ҳафтадан буён пневмониядан даволанаётганди ва коронавирус юқтириб олгани туфайли касалхонага тушганди.
https://twitter.com/captaintommoore/status/1356634749339590657
Мур нафақат Буюк Британияда, балки бутун дунёда машҳур кекса одамлардан бири эди. У 1920 йил 30 апрелда туғилган, 100 ёшга кириш арафасида Tom’s 100th Birthday Walk For The NHS (Томнинг 100 ёшида NHS учун пиёда сайр) деб номланган шахсий хайрия жамғармасини очган. Хайрия доирасида у ўз боғи атрофида 100 айлана юришга ва пандемияга қарши курашда Миллий соғлиқни сақлаш хизматини қўллаб-қувватлаш учун 1000 фунт стерлинг йиғишга ваъда берган.
2020 йил апрель ойи охирига қадар йиғилган пуллар 32 миллион фунтдан ошиб кетди, Мур миллий қаҳрамонга айланди. 800 мингдан ортиқ одам унга рицарлик унвони берилишини сўраб петиция имзолади.
Мурга рицарлик унвонини бериш маросими 2020 йилнинг июль ойида ўтказилганди.
Шахсий хайрия акциясидан ташқари Том Мур You’ll Never Walk Alone классик қўшиғини ижро этишда ҳам иштирок этган ва ушбу қўшиқ Британия чартида биринчи ўринга чиққан, дастлабки 48 соат ичида сотилган ёзувлар нусхалари эса барча рекордларни янгилаган.
Изоҳ (0)