Беларусь онкологлари гарчи саратонга чалинган беморлар COVID-19’га чалиниш эҳтимоли юқори бўлган қатламга киришига қарамай, касалликнинг айрим турлари билан оғриган кишиларнинг коронавирус инфекциясига чалиниш эҳтимоли паст бўлишини аниқлади. Бу ҳақда «Интерфакс» хабар қилди.
«Биз саратонга чалинган беморлар соғлиғидаги муаммолар, ҳолсизлик туфайли коронавирус юқтириб олиш эҳтимоли юқори бўлган кишилар сирасига киради деб тахмин қилгандик. Лекин айрим зарарли ўсимталарда COVID-19’га чалиниш анча кам учрайди», – деган Беларусь онкология ва тиббий радиология илмий-амалий маркази директор ўринбосари Сергей Красний.
У мисол тариқасида лимфом билан оғриган айрим беморларда учраган ҳолатни келтириб ўтган. Уларни қон таркибидаги лимфоцитлар коронавирусдан ҳимоя қилиши мумкинлиги тахмин қилинмоқда. Шунингдек, жиддий гормонал ва ўсимтага қарши терапия муолажасини олган беморлар, саратоннинг 4-босқичидаги кишиларда ҳам COVID-19’га чалиниш ҳолатлари кам кузатилган.
«Бундай беморлар кузатувларимизга кўра коронавирусга бошқаларга нисбатан камроқ чалинмоқда», – деган Красний.
Олим Беларусда коронавирус пандемияси даврида ҳам онкологик хизматлар беморларни одатий иш тарзи бўйича меъёрий ҳажмда қабул қилганини билдирган. Стационар даволанишга ётишдан аввал беморлар ПЗР-тест топширган, касалхонага келгач эса томография қилинган.
«Айрим ҳолатларда манфий деб топилган таҳлилларга қарамай, беморларда пневмония бошланганига гувоҳ бўлдик», – деган мутахассис.
Беларусь онкологлари саратонга чалинган беморларни эмлаш борасида якуний жавоб беришга шошилмаяпти. Сабаби мазкур масала қўшимча ўрганишлар ва махсус тадқиқотлар ўтказишни талаб этади. Шунга қарамай Красний ремиссия ҳолатидаги ва вакцинация учун тавсия қилинмайдиган беморлар соғлиғи устидан таваккал қилиш нотўғри эканлигини таъкидлаган.
Изоҳ (0)