Яшнободда 38 ёшли кишини Nexia уриб кетди. Жабрланувчи касалхонага олиб бориш вақтида вафот этди

Тошкент шаҳрининг Яшнобод туманида 38 ёшли киши Nexia уриб кетиши оқибатида ҳалок бўлди. Бу ҳақда пойтахт ИИББ матбуот хизмати хабар берди.

Воқеа 31 январь, якшанба куни, тахминан, соат 20:15 да Яшнобод туманидаги Охангарон кўчасида («Шош» ресторани қаршисида) юз берган. Nexia’ни ҳайдаб кетаётган 26 ёшли Б.М. 38 ёшли пиёда Тошкент вилоятилик С.М.ни уриб юборган. Оқибатда пиёда тиббиёт муассасасига етиб бормасдан ҳаётдан кўз юмган.

ЙТҲга ҳайдовчи йўлни белгиланмаган жойидан кесиб ўтаётган пиёдани кўрмай қолгани сабаб бўлган, деб тахмин қилинмоқда.

Ҳолат юзасидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) бўйича жиноий иш қўзғатилиб, тергов олиб борилмоқда.

Аввалроқ Фарғона вилоятининг Учкўприк туманида Lacetti йўлни кесиб ўтаётган аёлни уриб кетгани, Сирдарёда Gentra йўлни белгиланмаган жойдан кесиб ўтаётган маст эркакни уриб кетгани ҳақида хабар берилган эди. Ҳар икки пиёда воқеа жойида вафот этган.