Қорақалпоғистонда маст ҳайдовчи бошқарувидаги Nexia-3 йўл четида турган бешта машинага бориб урилди (видео)

Қорақалпоғистонда маст ҳолда автомобиль бошқарган ҳайдовчи ЙТҲга учраб, йўл четидаги 5 та машинани пачоқ қилди. Бу ҳақда ИИВ ЙҲХББ ахборот хизмати хабар берди.

Маълум қилинишича, 30 январь куни соат 16:00 ларда Қорақалпоғистон Республикаси Нукус шаҳар ҳудудидан ўтган А-380 Ғузор—Бухоро—Нукус—Бейнеу халқаро аҳамиятдаги автомобиль йўлининг 771-километрида 1971 йилда туғилган ҳайдовчи У.Р. Nexia-3 русумли автомобилда ҳаракатланаётиб, бошқарувни йўқотган ва қарама-қарши томонга ўтиб кетган. Натижада йўл четида тўхтаб турган 2 та Lacetti, Damas, Spark ҳамда Cobalt русумли автомобилларга урилган.

Ҳодиса оқибатида Nexia-3 русумли автомобиль ҳайдовчиси 50 ёшли У.Р.га биринчи тез тиббий ёрдам кўрсатилган. Транспорт воситалари техник шикастланган. Суриштирув ишлари давомида ҳайдовчи У.Р. маст ҳолда автомобиль бошқарганлиги маълум бўлган.

«Мазкур ЙТҲ юзасидан Нукус шаҳар ИИО ФМБ ЙҲХБ томонидан суриштирув ишлари олиб борилмоқда», — дейилади хабарда.

Аввалроқ Тошкентда Malibu йўл четида тўхтаб турган 2 та Lacetti’га урилиб, ағдарилиб кетгани тўғрисида хабар берилганди.