Yashnobodda 38 yoshli kishini Nexia urib ketdi. Jabrlanuvchi kasalxonaga olib borish vaqtida vafot etdi

Toshkent shahrining Yashnobod tumanida 38 yoshli kishi Nexia urib ketishi oqibatida halok bo‘ldi. Bu haqda poytaxt IIBB matbuot xizmati xabar berdi.

Voqea 31-yanvar, yakshanba kuni, taxminan, soat 20:15 da Yashnobod tumanidagi Oxangaron ko‘chasida (“Shosh” restorani qarshisida) yuz bergan. Nexia’ni haydab ketayotgan 26 yoshli B.M. 38 yoshli piyoda Toshkent viloyatilik S.M.ni urib yuborgan. Oqibatda piyoda tibbiyot muassasasiga yetib bormasdan hayotdan ko‘z yumgan.

YTHga haydovchi yo‘lni belgilanmagan joyidan kesib o‘tayotgan piyodani ko‘rmay qolgani sabab bo‘lgan, deb taxmin qilinmoqda.

Holat yuzasidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) bo‘yicha jinoiy ish qo‘zg‘atilib, tergov olib borilmoqda.

Avvalroq Farg‘ona viloyatining Uchko‘prik tumanida Lacetti yo‘lni kesib o‘tayotgan ayolni urib ketgani, Sirdaryoda Gentra yo‘lni belgilanmagan joydan kesib o‘tayotgan mast erkakni urib ketgani haqida xabar berilgan edi. Har ikki piyoda voqea joyida vafot etgan.